نصائح للمحاسبين - محاسب خلاصه لاصه و 100 100

قربت تخلص أو خلصت وحاسس انك مش عارف المدين من الدائن المحاسبة من الاقتصاد والدنيا متقفلة فى وشك او زهقت من قعدة البيت والقهاوى وطلعلك كرش وعاوز تشتغل فى مجالك ومش عارف تروح فين وتبدأ منين وانتى عاوزة تشتغلى انتى كمان عشان تحققى هدفك ولا توقعيلك عريس ايوة انتى بكلمك .
مش عارفين اية الطريق الصح والكورسات اللازمة عشان تبقى محاسب كويس يبقى تابعونا هنتكلم النهاردة باذن الله عن

أهم التحديات وكيف يمكن التغلب عليها والدخول سريعاً إلى سوق العمل

طالب كلية التجارة عاده لا يختار كليتة بنفسه بل يدفعه اليها دفعا مكتب التنسيق وبيبقى داخلها مضطر فأول حاجة احب اقلها وللطلبة الجديدة فى سنة اولى وتانية أهم حاجة تركز عليها.
1 - التقدير العام اللى هتخرج بيه .
2 - اللغة على الاقل تتقن اللغة الانجليزية وتبدأ فيها من يدرى لأنها بتاخد وقت طويل .
3 - التدريب فى بنك او شركة فى الاجازة الصيفية خلال ال3 سنين سواء واسطة او تبع الجامعة شهادة الخبرة بتاعتهم هتنفعك .

بعد التخرج بقى قدامك خطوات طبعاً ماتبصش للخطوات ككل كل حاجة حاجة بتيجى بالتدريج وواحدة واحدة
الخطوة الاولي : معرفة متطلبات سوق العمل .
الخطوة الثانية : الإعداد اولاً إعدادك محاسبياً + الكورسات خلصنا الاعداد المحاسبي من الناحيه العلمية يبقي ناقصلك نقطة البرامج المحاسبية مش لازم تاخد خبره بيها ومنها الاكسيل - peach tree - برنامج tally المشهور فى دول الخليج .

الخطوة الثالثة : إعداد C.V
الخطوة الرابعة : خلاص قدمت C.V بتاعك ربنا يوفقك .
تعالي ننتقل للنقطة الاهم الـ Interview عاده بيبقي مكون من جزئين أسئلة عامة وأسئلة متخصصة
الخطوة الخامسة : عديت الـ Interview واشتغلت؟ مبروك .
استني لسه الطريق طويل لازم تطور نفسك ايه رايك تدرس شهادة متخصصة ايوة ودى الشهادات المحاسبية وهناخد عنهم فكرة .
الخطوة الاولي : معرفه متطلبات سوق العمل دلوقتى خريج تجارة عامة او شعبة محاسبة خاصة امامه العديد من المجالات والطرق
اولاً : ان يصبح محاسبا ماليا في احدي شركات القطاع الخاص .
ثانياً : ان يصبح محاسب قانونى .
ثالثاً : ان يعمل في مجال البنوك .

عشان تبقى محاسب خلاصه لاصه و 100 100
 - المحاسبة هي اساس الشغل واساس كل شئ : يعنى البداية هى اجادة المحاسبة مش الكمبيوتر ولا اللغة وتقرأ من الكتب وليس الملخصات لانك لو فقدت مهارة التعامل مع الكتب مش هتعرف تتعامل مع الشهادات الكبيرة زى CMA.
- المحاسبة علم وفن واسلوب متنوع له كذا طريقة عشان كدة لازم تبقى ملم بيهم وكمان علم اصول وقواعد فى منها اللى ثابت واللى متغير ولازم تبقى متابع التغيرات المحاسبية .
- تعلم الكمبيوتر للاستخدام العام والاستخدام المحاسبي خاصة خد ICDL وكده لكن تركز عالبرامج اللى هتفيدك فى المحاسبة.
- عدم الانشغال بدراسه الكورسات التي لا ترتبط بالمحاسبة الا اذا كانت هواية مثلاً مش تروح تتعلم اوتوكاد وبرمجة وانت عاوز تشتغل محاسب .
- تعلم اللغة لانها المفتاح نحو طريق الاحتراف ولابد من الصبر في تعلم اللغة .
عارف انت ممكن تتعلم المحاسبة فى اربع سنين والكمبيوتر فى سنة او شهور اما اللغة هتفضل تتعلمها طول العمر واللغة ليها وظائف عشان تبقى كويس لازم تمارس الوظايف دى الاستماع Listening القراءة Reading التحدث Talking التواصل Communicatiing .
-اهم مايميز المحاسب علي الاطلاق الامانة ( الاخلاقية - المهنية ) .

محاسب معاصر = خريج يعرف محاسبة كويس يعنى فاهم محاسبة + تطبيق المحاسبة يدوياً والكترونياً + متعلم كمبيوتر + يعرف لغه انجليزية
 
 لكى تكون محاسب جيد يجب انت تقوم بالأتى :
1- تحب المحاسبة اولا وتعرف ان علم المحاسبة علم مرن .
2- معرفة الفرق بين المدين والدائن .
3- معرفة طبيعة كل حساب هل طبيعة الحساب مدين ام دائن علي سبيل المثال حـ/ الصندوق طبيعتة مدينة اى عند ظهور رصيدة فى الميزانية يجب ان يكون مدين حـ/ الدائنون من اسمه هو حساب دائن وهكذا.
4- معرفة كيفية التعامل مع الأرقام لترجمتها إلى قيود .
5- كيفية الترصيد فى الدفاتر (الأستاذ، اليومية الأمريكية ، اليومية العامة ، دفاتر المشتريات والموردين والعملاء ) .
6- كيفية استخراج الحسابات الختامية المتمثلة فى قائمة المركز المالى ، قائمة الدخل ، قائمة التدفق النقدى .... .
7- عمل قيود الإقفال وقيود الأفتتاح .
8- ويجب ان تكون محاسب مطلع على كل ماهو جديد فى عالم المحاسبة من قانون الدخل وقانون ضرائب المبيعات والضرائب العامة وكيفية التعامل معهم ومواعيد تقديم الأقرارات الضريبية وقانون التأمينات الإجتماعية ..... .

إعداد محاسب / محمود عامر

اقرء المزيد

المدين والدائن والقيد المحاسبى 2

-  يعنى ايه مدين ويعنى ايه دائن :
احنا قولنا ان اى معاملة بيبقى ليها طرفين او اكثر اطراف بتدى واطراف بتاخد ، المحاسبة بقى بتسميهم مدين ودائن طب بعرفها ازاى ،اعرف منين مين هو الطرف المدين والطرف الدائن ؟ فى طريقتين بيكملوا بعض ومن خلالهم نقدر نحدد مين هو الطرف المدين ومين هو الطرف الدائن .

- الطريقة الاولى : الطريقة البلدى بمعنى اصح :
الطرف اللى بياخد بيزيد باللى خده يبقى مديون باللى خده وزاد بيه للشخص اللى اداه يبقى مدين .
الطرف اللى بيدى بينقص باللى اداه يبقى مداين الشخص اللى خد منه باللى ادهوله ونقص بيه يبقى داين او دائن .
مثال 1:
محمد ادى لأحمد 50 ج :
يبقى محمد هو اللى ادى الـ50 ج يعنى هو اللى نقص فبقى هو اللى مداين احمد بال 50 ج يبقى محمد دائن ( العاطى )
واحمد خد 50ج من محمد يعنى فلوسه زادت ب50 ج فبقى مديون لمحمد بقيمة ال50 ج اللى خدها منه  و هيبقى أحمد مدين ( الآخد ).
مثال 2 :
شركة (يوميات محاسب) ادت شركة (المحاسب) بضاعة على الحساب (يعنى مدفعتش فلوسها ) (يعنى خدت البضاعة وهتدى فلوسها بعدين)
لازم تاخد بالك جدا جدا : فى علم المحاسبة مينفعش اقول انا الشركة اللى انا زادت او قلت لا انا بشوف ايه الطرف اللى زاد فى الشركة (يعنى ايه الحاجة اللى جوة الشركة ) زادت وايه الحاجة اللى قلت جوة الشركة .
فى المثال ده شركة (يوميات محاسب) باعت بضاعة لشركة (المحاسب) على الحساب دلوقتى عايزين نحدد مين الطرف المدين والطرف الدائن فى كل شركة :
اولاً : لو انت محاسب فى شركة (المحاسب) :
ايه الطرف المدين : الشركة دلوقتى اشترت بضاعة والبضاعة بتتحط فى المخزن يعنى المخزن زاد بقيمة البضاعة اللى اشتريتها يبقى مديون بقيمة البضاعة دى يبقى المخزن هو الطرف المدين .
ايه الطرف الدائن : دلوقتى شركة (يوميات محاسب) ادت البضاعة للشركة يعنى شركة (يوميات محاسب) قلت ونقصت باللى ادته تبقى مداينة الشركة يبقى شركة (يوميات محاسب) هى الدائن .
ثانياً : لو انت محاسب فى شركة (يوميات محاسب) : 
ايه الطرف المدين : دلوقتى الشركة باعت بضاعة لشركة (ٍالمحاسب) يعنى شركة (المحاسب) هى اللى خدت وزادت بقيمة البضاعة اللى خدتها فبقت مديونة بالقيمة دى فشركة (المحاسب) هى الطرف المدين.
ايه الطرف الدائن : دلوقتى الشركة باعت البضاعة للشركة (المحاسب) يعنى المخزن بتاع الشركة نقص بقيمة البضاعة اللى طلعت منه يبقى مداين شركة (المحاسب) بالبضاعة يبقى المخزن دائن .

ويبقى كدة ملخص الطريقة الاولى ان (الطرف اللى بياخد بيزيد باللى خده ومديون بقيمة اللى خده للطرف التانى يعنى مدين له ، والطرف الى بيدى بينقص باللى اداه وبيبقى مداين الطرف التانى باللى ادهوله يعنى دائن ) . 
الطريقة التانية : الجدول السحرى
دلوقتى احنا قولنا ان المحاسبة بتقسم جميع الحسابات (الاطراف يعنى ) الى 4 اقسام رئيسية وهما (الاصول والإلتزامات والمصاريف والايرادات)
1- اى حساب (طرف) تبع الاصول طبيعته مدينة ، المعاملة اللى حصلت عليه زودت قيمته فى الشركة يبقى هو مدين فى المعاملة دى يعنى مدين فى القيد ، المعاملة اللى حصلت عليه نقصت قيمته فى الشركة يبقى هو دائن فى المعاملة يبقى دائن فى القيد .
2 –اى حساب (طرف) تبع الإلتزامات طبيعته دائن ، المعاملة اللى حصلت عليه زودت قيمته( قيمة الخصوم يعنى او الالتزامات ) فى الشركة يبقى هو دائن فى المعاملة دى يعنى دائن فى القيد ، المعاملة اللى حصلت عليه نقصت قيمته فى الشركة يبقى هو مدين فى المعاملة يبقى مدين فى القيد .
3 - اى حساب (طرف) تبع المصروف طبيعته مدينة ، المعاملة اللى حصلت عليه زودت قيمته فى الشركة يبقى هو مدين فى المعاملة دى يعنى مدين فى القيد ، المعاملة اللى حصلت عليه نقصت قيمته فى الشركة يبقى هو مدين برده فى المعاملة يبقى مدين برده فى القيد (المصروف قل او زاد بيفضل مدين )
مثال :
يعنى عندى مصروف الكهرباء فى شهر يناير قيمته 200جـ فهو مدين ، فى شهر فبراير قل وبقى 100جـ هيفضل برده مصروف واتدفع يعنى (مدين ).
4 - اى حساب (طرف) تبع الايرادات طبيعته دائنة ، المعاملة اللى حصلت عليه زودت قيمته فى الشركة يبقى هو دائن فى المعاملة دى يعنى دائن فى القيد ، المعاملة اللى حصلت عليه نقصت قيمته فى الشركة يبقى هو دائن برده فى المعاملة يبقى دائن برده فى القيد (الايراد قل او زاد بيفضل دائن )
مثال :
يعنى عندى ايراد بيجى من ايجار محل فى شهر يناير اجرته ب 500ج فهو دائن ، فى شهر فبراير اجرته ب 300ج هيفضل برده ايراد وجالى يعنى (دائن).
وده شكل الجدول السحرى :

 

 بعد ماخلصنا الطريقتين لازم تعرف انهم بيكملوا بعض ولازم النتيجة تبقى واحدة الطرف (الحساب) اللى بطلعهولك اى طريقة مدين لازم الطريقة التانية تطلعهولك مدين مينفعش تطلعه داين (مستحيل ) ونفس الكلام للحساب (الطرف ) الدائن .

يعنى ايه (من حـ - إلى حـ)
اولا ال (حـ) دى اختصار لكملة حساب يعنى بقول من حساب كذا او الى حساب كذا ، طب امتى بحط (من) اومتى بحط (الى) ؟
اى طرف مدين بحط قبليه (من) ، واى طرف دائن بحط قبليه (الى) (هى تتحفظ كده :) ) .
معلومة على الماشى
من حـ / الى حـ بتستخدم بس فى المحاسبة اليدوية (محاسبة الدفاتر) وبنسبة 99 % مفيش شركات دلوقتى شغالة دفتريا كل الشركات بتشتغل الشغل بتاعها عن طريق برامج محاسبية ودى بقى انواعها كتييييييييييير جدا وبقت تسهل كتير على المحاسب (البرامج دى مفهاش حتة (من حـ) و(الى حـ)) ، المحاسب بقى يختار الحساب او الطرف ويحط قيمته مدين او دائن على حسب هو عايز ايه .

- دلوقتى بعد ما شرحنا قيد اليومية ويعنى ايه مدين ودائن وازاى تحدد مين هو الطرف المدين والطرف الدائن ، ايه بقى الخطوات اللى تعملها علشان تعمل اى قيد يقابلك ؟
1- لازم تكون ملم بجميع الحسابات ( اللى هى الاطراف ) اللى بتتعامل معاها الشركة يعنى عارف شجرة الحسابات بتاعت الشركة كويس ودى بتيجى من الخبرة وبمرورك على شركات كتير مختلفة المجال ولازم تعرف كل حساب من الحسابات بيعبر عن انهى طرف من الاطراف .
2 – لازم تعرف تاريخ المعاملة علشان تعرف هتعمل القيد بتاعك فى اى شهر (مينفعش تكون المعاملة مثلا فى مارس وانت تعملها فى ابريل او تعملها فى فبراير)علشان لازم تكون البيانات اللى بتقدمها لاصحاب الشركة تكون صح ومش مغلوطة .
3– لازم تعرف اطراف اى معاملة : ودى بتحصل لما تقرا المعاملة كويس وتشوف ايه الاطراف (الحسابات ) اللى هتتاثر بالمعاملة دى (ايه الاطراف اللى هتزيد وايه الاطراف اللى هتقل نتيجة المعاملة دى ) 
مثال :
الشركة دفعت اجور، يبقى مين الاطراف اللى اتاثرت : اولا الاجور ده مصروف من ضمن المصاريف اللى بتدفعها الشركة ودفعت اجور يبقى مصروف الاجور ده زاد ويبقى ده اول طرف ، طب هى دفعت الفلوس دى عن طريق ايه ؟ دفعتها عن طريق البنك يبقى البنك نقص يبقى ده الطرف التانى فى المعاملة ، وهكذا .
بعد ما حددت الاطراف لازم تحدد مين الطرف المدين ومين الطرف الداين وده زى ماشرحنا فوق بنحدده ازاى .
4 – لازم تعرف قيمة المعاملة يعنى الطرف اللى زاد زاد بكام والطرف اللى قل نقص بكام ،يعنى لو فى المثال اللى فوق قالك ان الشركة دفعت اجور 200,000.00 يبقى مصروف الاجور زاد بال 200,000.00 والبنك نقص بنفس القيمة 200,000.00.
وبكدة يبقى انت تقدر تعمل اى قيد .
مثال :
فى 15 / 1 دفعت الشركة ايجار المكتب ب2000 ج ودفعت رسوم نظافة ب200 ج والكهرباء ب 350 ج من خزينة الشركة .
هتمسك المعاملة بقى زى ما احنا ما قولنا :
اولا : هتبص على تاريخ المعاملة وهى 15 / 1 يعنى كدة هتعمل القيد فى شهر يناير ،
ثانيا : بيقولك ان الشركة دفعت مصاريف من خزينة الشركة والمصاريف عبارة عن (ايجار , نظافة , كهرباء) وقالك دفع المصاريف دى من خزينة الشركة يبقى ايه هى الاطراف اللى اتاثرت بالمعاملة : 
1- مصروف الايجار , 2- مصروف النظافة , 3 – مصروف الكهرباء , 4 – خزنة الشركة
ثالثا : عايز اعرف مين المدين ومين الدائن ؟
هعملها بطريقة الجدول السحرى وانت اعملها بالطريقة البلدى
المصاريف دى احنا قولنا ان طبيعتها مدينة ولما بتزيد او بتقل فبتفضل مصروف يعنى مدينة وهنا المصاريف زادت يبقى ال 3 مصاريف (مدين )
خزينة الشركة دى اصل من الاصول علشان دى فلوس بتاعت الشركة وتمتلكها واحنا قولنا ان الاصول طبيعتها مدينة ولو زادت هتفضل مدينة ولو نقصت هتبقى دائنة
وهنا هى خرجت منها فلوس يعنى نقصت يعنى (دائنة) ،يبقى كدة عندى 3 اطراف مدينة وطرف دائن
رابعا : قيمة الاطراف عندنا اول طرف الايجار زاد ب2000 ج , تانى طرف النظافة ب200 ج , تالت طرف الكهرباء زاد ب 350 ج , رابع طرف بقى الخزنة دفع مصروف الايجار ومصروف النظافة ومصروف الكهرباء يعنى نقص ب2000 + 200 +350 يعنى نقص ب2550
ويبقى شكل القيد كده
من مذكورين (علشان فى كذا طرف مدين)
2000 حـ / مصروف الايجار
200 حـ / مصروف النظافة
350 حـ / مصروف الكهرباء
       2550 الى حـ / خزينة الشركة
ويكون شرح القيد (دفع مصاريف الكهرباء والايجار والنظافة من خزينة الشركة)
(الشرح بمزاجك بس اهم حاجة يكون معبر عن المعاملة)
خلى بالك :
1- ان مجموع الاطراف المدينة = مجموع الاطراف الدائنة = 2550 (لازم اطراف القيد (المدين والدائن )تكون متساوية) .
2 – محطناش (من حـ )فى الجانب المدين علشان فى اكتر من طرف مدين فكلمة (من مذكورين ) بتغنى عن كملة (من حـ) ونفس الكلام لو كان فيه اكتر من طرف داين .

 إعداد محاسب / محمد محسن

اقرء المزيد

المدين والدائن والقيد المحاسبى 1

أولاً : يعنى ايه شركة ؟
الشركة دى عبارة عن منظومة او كيان بيكونها شخص او مجموعة اشخاص علشان يمارسوا من خلالها نشاط معين يحققوا بيه ربح وبتعتبر الشركة شخص بيمثل الاشخاص اللى كونوا الشركة دى علشان كده بتتسمى الشركة ب (شخص اعتبارى) .
طب ايه اللى بيحصل جوا الشركة ؟
معاملات يومية تخص النشاط بتاع الشركة زى مثلاً (الشركة اشترت بضاعة ، الشركة باعت بضاعة ، الشركة سددت فلوس بضاعة ،الشركة سلفت ناس فلوس ، الشركة دفعت مصاريف ، الشركة خدت فلوس بضاعة ، الخ) كل دى معاملات بتحصل بشكل يومى او اسبوعى او شهرى جوة الشركة ، اى معاملة بتحصل جوة الشركة او اى معاملة فى الدنيا دى بتبقى ليها طرفين (طرف بيدى وطرف بياخد) يعنى مثلا :
- (الشركة اشترت بضاعة) فى طرف خد وهو الشركة (خدت بضاعة ) / وفى طرف ادى وهو الناس اللى باعت البضاعة للشركة .
- (الشركة سلفت فلوس ) فى طرف خد اللى هو خد الفلوس / وفى طرف ادى الفلوس اللى هو الشركة .
 
طبعا لما حجم الشركة بيكبر حجم النشاط بيكبر وبالتالى حجم التعاملات بيكبر وبرده حجم الاطراف بيكبر وبيبقى صعب على اصحاب الشركات ان هما يفتكروا كل التعاملات اللى حصلت وحصلت امتى وبكام وليه ؟ كل دى معلومات مهمة جدا جدا ابسط حاجة علشان يعرفوا هما كسبوا ولا خسروا من النشاط ده وكسبوا كام او خسروا كام ومن هنا ظهرت اهمية المحاسبة انها بتسجل كل المعاملات اللى بتحصل جوة الشركة وبتلخصها فى شكل تقارير تبين وتوفر كل المعلومات اللى عايزها صاحب الشركة ، وبتسجل العمليات دى عن طريق القيد المحاسبى .
يبقى نقدر نقول ان القيد المحاسبى : دى وسيلة بنقدر نسجل بيها كل العمليات والمعاملات اللى بتحصل جوة الشركة يوميا (بجميع الاطراف الطرف اللى بياخد والطرف اللى بيدى) ومن خلال التسجيل ده نقدر نلخص كل المعاملات دى فى شكل تقارير نقدر ناخد منها اى معلومة احنا عايزنها .
طب ازاى بقى القيد المحاسبى بيسجل اى معاملة بتحصل ؟
اولاً المحاسبة بتتعامل بالحسابات مش بالاطراف ، يعنى ايه ؟ ، المحاسبة بتشوف كل الاطراف اللى اتعاملت معاها الشركة واللى بتتعامل معاها واللى ممكن تتعامل معاها فى المستقبل وبتكون بيها شجرة الحسابات (شجرة الحسابات دى عبارة عن كل الاطراف اللى بتتعامل او ممكن تتعامل معاها الشركة ) فكل طرف من الاطراف بيبقى ليه حساب باسم بسيط يعبر عنه علشان يبقى سهل فى استخدامه يعنى مثلا :
مينفعش كل مرة اشترى فيها بضاعة اقول (انا اشتريت بضاعة من الشركة اللى بشترى منها بضاعة بقيمة 500 ج مثلا) فالشركة اللى بشترى منها بضاعة ليها حساب اسمه (المورد )(يعنى اللى بيوردلى بضاعة )
نفس الكلام على الشركة اللى ببيع ليها بضاعة ليها حساب اسمه (عميل ) ، وهكذا كل طرف بتتعامل معاه الشركة بيبقى ليه مسمى بنتعامل بيه حسابياً بيعبر عنه ، والمحاسبة قسمت الاطراف كلها اللى بتتعامل معاها الشركة ل 4 تصنيفات رئيسية :

1 – حاجات بتمتلكها الشركة وليها الحق الكامل فى التصرف فيها ببيعها او تاجيرها وفى اى وقت تقدر تحولها لفلوس ودى اسمها (أصول )
امثلة :
فلوس الشركة اللى فى البنك ، الارض بتاعت الشركة ، المبنى بتاع الشركة ، الالات والمعدات اللى فى الشركة ، فلوس الشركة اللى عند العملاء ، الاثاث ، البضاعة بتاعت الشركة . (كل الحاجات دى بتتوافر فيها صفات الأصول يعنى الشركة بتمتلكهم وتقدر تتصرف فيهم فى اى وقت )
2- اى التزامات على الشركة واى فلوس مديونة بيها الشركة والمفروض تدفعها ودى اسمها (الإلتزامات أو الخصوم )
امثلة :
الالتزامات اللى على الشركة دى بتنقسم لنوعين (التزامات داخلية والتزامات خارجية ):
أ - التزامات داخلية : يعنى فلوس مديونة بيها الشركة والتزام عليها لصالح ناس جوة الشركة زى (راس المال ، جارى الشركاء ، الارباح ، الاحتياطات)
ودى بتتسمى ( بحقوق الملكية )
ب- التزامات خارجية : يعنى فلوس مديونة بيها الشركة والتزام عليها لصالح ناس برة الشركة زى ( الفلوس اللى عليا للموردين ، القروض اللى باخدها من البنوك، اوراق الدفع )
3- المبالغ اللى الشركة بتدفعها علشان تاخد قصادها خدمه (الخدمة دى اللى هتساعد الشركة انها تنتج وبالتالي هتبيع وبالتالي تكسب) وده اسمه (المصروف)
امثلة :
زى الايجار ، الكهرباء ، المياة ، المرتبات (كل دى فلوس بتدفع علشان اخد الخدمة اللى هتساعدنى فى الانتاج وبالتالى هبيع واكسب )
4 – كل المبالغ اللى بتاخدها الشرك ةمقابل اىبضاعة باعتها او خدمة ادتها ودى اسمها (ايراد)
امثلة :
زى الفلوس اللى بتاخدها الشركة مقابل بيع البضاعة (المبيعات )، الارباح الراسمالية ، منح من الحكومة (واى حاجة بتتوافر فيها صفات الايراد)

يبقى جميع الاطراف اللى بتتعامل معاها الشركة بتقسمها المحاسبة ل4 تصنيفات رئيسية ملهومش خامس (الاصول ، الخصوم ، المصروفات ، الايرادات ) وتحت كل تصنيف فى تقسيمات فرعية علشان توضح طبيعة وتصنيف كل طرف (حساب) .
نرجع بقى للسؤال : ازاى بقى القيد المحاسبى بيسجل اى معاملة بتحصل؟

القيد المحاسبى بيسجل كل حاجة تخص المعاملة :
اولاً : تاريخ المعاملة : علشان يقولك امتى المعاملة دى حصلت .
ثانياً : اطراف المعاملة : احنا قولنا ان اى معاملة بتبقى ليها طرفين (طرف بيدى او طرف بياخد)(القيد بيوضحلك مين الطرف اللى خد ومين الطرف اللى ادى .
وممكن يكون للمعاملة اكتر من طرفين (يعنى مثلا طرفين ادوا لطرف واحد ) (فهو برده بيسجل وبيقول الاطراف اللى ادت والطرف اللى خد)
ثالثاً : قيمة المعاملة : علشان يقولك الطرف اللى خد خد كام واللى ادى ادى كام ؟
رابعاً : توضيح المعاملة (شرح القيد): علشان اللى يقرا القيد يفهم المعاملة دى عبارة عن ايه وحصلت ليه .
وده شكل القيد المحاسبى :

معلومات كده على الماشى :
1 – رقم القيد : كل قيد بياخد رقم بحيث يبقى سهل على اى شخص يدور عليه ويجيبه .
2- تاريخ القيد : وده التاريخ اللى حصلت فيه العملية او المعاملة .
3- رقم الحساب : احنا قولنا ان المحاسبة بتتعامل مع حسابات ، لكل طرف من الاطراف اللى الشركة بتتعامل معاها حساب بيدل عنه ولكل حساب ليه رقم علشان يبقى سهل برده ان اى حد يدور على اى حساب هو عايزه يعنى مثلا الاصول بتبدى حسابتها برقم (1) ، الالتزامات رقم (2) ، المصروفات رقم (3) ، الايرادات رقم (4)
4 – من مذكورين : دى بتتكتب لما يكون فيه اكتر من طرف بياخد او اكتر من طرف بيدى (فبقول ان المذكورين دول خدوا ، المذكورين دول ادوا )
5- اى معاملة فى الدنيا (لازم تكون متساوية ومتكافئة ) يعنى مينفعش ادى واحد حاجة ب100 ج ويروح مدينى 90 ج لا بيدينى 100 (اللى هى قيمة البضاعة ) فلازم كل الاطراف اللى بتاخد = كل الاطراف اللى بتدى .

- سيتم أستكمال الموضوع فى تدوينة آخرى فتابعونا

إعداد محاسب / محمد محسن

اقرء المزيد

سلسلة سؤال وجواب - 5 - أسئلة محاسبة

 • السؤال السادس عشر : 
قامت شركه النور ببيع سياره بمبلغ 50000 جنيها نقداً بتاريخ 1-7-2016
مع العلم بانه تم شراء السياره في 1-1-2013 بقيمه 100000 جنيه نقداً
والشركه تتبع طريقة القسط الثابت ونسبه الاهلاك 20%
المطلوب : 
المطلوب القيود المحاسبيه للسياره من 2013 حتي تاريخ البيع .
الاجابة :
1/1/2013
اثبات عملية شراء السيارة :
100000 من حـ / الأصول- السيارات
100000 إلى حـ / النقدية
.................................
31/12/2013
احتساب مصروف الاهلاك
100000×%20 = 20000
20000 من حـ / مصروف. الاهلاك
20000 الى حـ / مجمع الاهلاك
.....................................
31/12/2014
20000 من حـ / مصروف. الاهلاك
20000 الى حـ / مجمع الاهلاك
.......................................
31/12/2015
20000 من حـ / مصروف. الاهلاك
20000 الى حـ / مجمع الاهلاك
...................................
1-7-2016
- اثبات عملية البيع :
احتساب م. الاهلاك عن 6 شهور
20000×%20× ( 6/12)
10000 من حـ / مصروف. الاهلاك
10000 الى حـ / مجمع الاهلاك

- اثبات عملية بيع الأصل
من مذكورين
50000 حـ / النقدية
70000 حـ / مجمع الاهلاك
إلى مذكورين :
100000 حـ / الأصول - السيارات
20000 حـ / ارباح راسمالية

 • السؤال السابع عشر :
حصلت شركة العمار علي عقد مقاولة بمبلغ 100000جنيه تم سداد 25% نقدا بتاريخ 22-4 من العميل شركه أيمن عصام كدفعة مقدمة من قيمة العقد تخصم بنفس النسبة المستخلصات ويقوم العميل شركة أيمن عصام باستقطاع الضرائب نصف % من قيمة من كل مستخلص و5% تامين ضمان أعمال يسدد بعد سنة وتقوم شركة العمار ضريبة المبيعات علي كل مستخلص 2.9% باضافة .
تم تقديم المستخلص رقم 1 بتاريخ 6-6  بعد اعتماده بمبلغ 20000 جنيه قيمه الاعمال المنفذه من بدايه الاعمال حتي 2-6 وتم استلام صافي قيمة المستخلص نقداً .
بتاريخ 22-7 تم تقديم المستخلص رقم 2 بقيمة اعمال منذ بداية الاعمال بمبلغ 50000 جنيه وتم استلام صافي قيمة المستخلص نقدا بتاريخ 28-7 .
المطلوب : 
القيود المحاسبية للعمليات السابقة .
الاجابة :

- قيد الدفعة المقدمة
25000 من حـ / النقدية
25000 الي حـ / دفعة مقدمة

- قيد أول مستخلص
من مذكورين
5000 حـ / الدفعة المقدمة
100 حـ / ضرائب ا ت ص
1000 حـ / تامين ضمان اعمال
14480 حـ / عملاء - ايمن عصام
إلي مذكورين
20000 حـ / ايرادات عمليات
580 حـ / ضريبة مبيعات
- قيد السداد
14480 من حـ / النقدية
14480 الي حـ / العملاء أيمن عصام

- قيد المستخلص الثاني
من مذكورين
7500 حـ / الدفعة المقدمة
150 حـ / ضرائب ا ت ص
1500 حـ / تامين ضمان اعمال
21720 حـ / عملاء أيمن عصام
الي مذكورين
30000 حـ / ايرادات عمليات
870 حـ / ضريبة مبيعات
 - قيد السداد
21720 من حـ / النقدية
21720 الي حـ / العملاء أيمن عصام

 • السؤال الثامن عشر :
 قامت شركه الضياء بتأجير مخزن لمدة سنة بقيمة 30000 جنيهاً سنوياً اعتبارا من 1-5 2016 حتي 30-4-2017 وقامت بتحصيل القيمه نقداً بتاريخ 1-5 بالاضافة الي شهرين تأمين .
المطلوب : 
القيود المحاسبية للعمليات السابقة .
الاجابة :

- قيد تحصيل ايراد يخص عامين متداخلين واثبات التامين من الغير .

35000 من حـ / النقدية
الي مذكورين
20000 حـ / ايرادات
10000 حـ / إيرادات مقدمة ( دائنين )
5000 حـ / تأمينات من الغير (دائنين )

دي ناتج القيود لكن ممكن تقيد باكثر من طريقة ولكن جميعها تعطي نفس النتيجة بتحميل 2016 بايرادات بمبلغ 20000 ورصيد للايرادات المقدمة بالميزانية في 10000 + 5000 تأمين شهرين .

اقرء المزيد

ماذا تعنى التكاليف المعيارية ؟

التكلفة المعيارية تمثل واحدًة من أنجح الأساليب المستخدمة في مجالات رقابة وضبط التكلفة الفعلية ، وهي أداة تهدف إلى محاولة مطابقة الأداء الفعلي مع الأداء المستهدف ؛ أي مطابقة التكلفة الفعلية مع التكلفة المعيارية ، الأمر الذي يعني عدم وجود انحراف بين التكلفة الفعلية والتكلفة المعيارية .
التكلفة المعيارية في أبسط معانيها تعني " التكلفة واجبة الحدوث في ظل الظروف الطبيعية والمألوفة للمنشأة ، والتي ( التكلفة المعيارية ) لا تحتوي على أي نواحٍ للإسراف أو الضياع غير الحتمي أو غير المسموح به . والتكلفة المعيارية ما هي إلا محصلة كمية معيارية مرجحة بسعر معياري " . اختصارًا تتحدد التكلفة المعيارية في ضوء المعادلة التالية :

سعر معياري × التكلفة المعيارية = كمية معيارية

الكمية المعيارية يقصد بها كمية المورد الاقتصادي اللازمة لإنتاج الوحدة الواحدة ، وعليه فإن الكمية المعيارية للمواد الأولية ( المواد الخام أو المواد المباشرة ) تمثل كمية المواد الأولية اللازمة لإنتاج الوحدة الواحدة من المنتج ، وبالمثل فإن المقصود بالكمية المعيارية لتكلفة العمالة المباشرة هو ساعات العمل المباشر اللازمة لإنتاج الوحدة الواحدة من المنتج .
السعر المعياري يقصد به أساس الترجيح الذي من خلاله يتم تحويل الكمية المعيارية إلى تكلفة معيارية ، وعليه فإن السعر المعياري لتكلفة المواد يمثل سعر الشراء المخطط لوحدة قياس تكلفة المواد المباشرة ( كيلو جرام ، لتر ، متر)، وعليه أيضًا فإن السعر المعياري لتكلفة العمالة المباشرة عبارة عن معدل الأجر المخطط أن يحصل عليه عامل الإنتاج في الساعة الواحدة ، وأخيرًا
يقصد بالسعر المعياري للتكلفة الصناعية غير المباشرة معدل التحميل المخطط للتكلفة الصناعية غير المباشرة .
التكلفة المعيارية للوحدة الواحدة تحدد قبل بداية العملية الإنتاجية ، حتى يتم الاسترشاد بها خلال مرحلة التنفيذ الفعلي للعملية الإنتاجية ، وهذه هي إلا أن اختلاف الظروف . Ex- anti Standard Cost التكلفة المعيارية القبلية المتوقعة - التي صيغت التكلفة المعيارية القبلية في ضوئها - عن الظروف الفعلية التي تم فيها التنفيذ الفعلي ، يحتم ضرورة تعديل ال م عايير القبلية المصاغة في ظل الظروف المتوقعة بجعلها تتمشى مع الظروف الفعلية ؛ أي أن هناك حاجة لتعديل المعايير القبلية لتتمشى مع الظروف الفعلية وبما يجعلها أداة جيدة للرقابة وتقييم الأداء ، وهذه المعايير المعدلة بعد مرحلة التنفيذ يطلق  Ex- post Standard Cost عليها التكلفة المعيارية البعدية

اقرء المزيد

سلسلة سؤال وجواب - 4 - أسئلة محاسبة

• السؤال الثانى عشر : 
مطلوب القيود المحاسبية في حالة اتباع الشركه الجرد المستمر للعمليات التالية بشركة يوميات محاسب
- شراء 5 طن سكر بقيمة 25000 جنيه بالاجل من شركة المحاسب وقامت بخصم ضريبه نصف % .
- شراء 3 طن أرز بقيمة 12000 جنيها بالاجل من شركة شريف .
- شراء بالاجل من شركة موسى 5 طن حديد بقيمة 25000 جنيه وتم اضافة 2000 جنيه ضريبة مبيعات بمعرفة المورد شركة موسى وقامت شركه يوميات محاسب بخصم نصف % ضريبة .
المطلوب : 
اجراء القيود المحاسبية علماً بان شركة يوميات محاسب تتبع نظام الجرد المستمر
الاجابة :
في حاله الجرد المستمر يوسط المخزون بدل المشتريات
- الاولى
مشتريات اجله وخصم ضرائب
25000 من حـ / المخزون
الى مذكوربن
24875 حـ / الموردين شركة المحاسب
125 حـ /ضرائب خصم منبع

- الثانية
مشتريات اجله
12000 من حـ / المخزون
12000 الى حـ / الموردين شركة شريف

- الثالثة
مشتريات اجله والسلعة خاضعة لضريبة المبيعات وتم خصم ضرائب من المورد
من مذكورين
25000 حـ / المخزون
2000 حـ / ضريبة المبيعات
الى مذكورين
26875 حـ / الموردين شركة موسى
125 حـ / ضرائب مستقطعه من الغير

• السؤال الثالث عشر : 
الشركه تتبع الجرد المستمر
قامت شركه السلام بشراء 5 طن حديد بقيمه 25000 جنيه وتم اضافه 2000 جنيه ضريبة مبيعات بمعرفة المورد شركة الضحي وقامت شركه السلام خصم نصف % ضريبة .
وقامت شركه السلام ببيع نفس الكمية للعميل على علي بقيمه 30000 جنيه وتم اضافه 2400 جنيه ضريبة مبيعات وقام العميل بخصم نصف % ضريبة . .
المطلوب : 
القيود المحاسبية للعمليات السابقة في حالة الشراء والبيع علماً بان شركه السلام تتبع الجرد المستمر
الاجابة :
عند اتباع الجرد المستمر يوسط حساب المخزون عند الشراء فيجعل مدين وعند البيع يثبت قيد بتكلفة البضاعة المباعة كطرف مدين والطرف الدائن هو المخزون
ويثبت قيد المبيعات وهو واحد في حاله الجرد الدوري او المستمر

- أولاً : مشتريات اجله والسلعة خاضعه لضريبة المبيعات وتم خصم ضرائب من المورد
من مذكورين
25000 حـ / المخزون
2000 حـ / ضريبة المبيعات
إلى مذكورين :
26875 حـ /  الموردين - شركة الضحى
125 حـ / ضرائب الخصم والاضافة

ثانيا : قيد البيع
المبيعات في حاله السلعى خاضعة لضريبة المبيعات وتم خصم ضرائب بمعرفه العميل
من مذكورين
32250 حـ /  العملاء – محسن
150 حـ /  ضريبة الخصم والاضافة
إلى مذكورين :
30000 حـ /  المبيعات
2400 حـ /  ضرائب المبيعات

ثالثاً : قيد اثبات تكلفة المبيعات للبضاعة المباعة
25000 من حـ /  تكلفة المبيعات
25000 الي حـ / المخزون


• السؤال الرابع عشر :
قامت شركة الصفا ببيع كمية 10 طن أرز بقيمة 100000 جنيه لشركة الوفاء
قامت شركة الوفاء برد 5 طن أرز لشركة الصفا
قامت شركة الصفا بمنح خصم 5000 جنيه لشركة الوفاء وقامت شركه الوفاء بسداد باقي المستحق عليها لشركه الصفا نقدا
المطلوب :
القيود المحاسبية للعمليات السابقة بحسابات شركة الصفا مرة ومرة بحسابات شركة الوفاء .
الاجابة :
دفاتر شركة الصفا مورد اي بائع
القيد الاول
- قيد البيع الاجل
100000 من حـ / العملاء شركة الوفاء
100000 الى حـ / المبيعات
القيد الثانى
- قيد مردودات مبيعات
50000 من حـ / مردودات مبيعات
50000 الى حـ / العملاء شركة الوفاء
القيد الثالث
- قيد خصم للعميل وسداد من العميل
من مذكورين
5000 حـ / خصم مسموح به
45000 حـ / نقدية بالخزينه
50000 الى حـ / العملاء شركة الوفاء
دفاتر شركه الوفاء عميل اي مشتري
القيد الاول
- قيد المشتريات الاجله
100000 من حـ / المشتريات
100000 الى حـ / الموردين شركة الصفا
القيد الثانى
- قيد مردودات مشتريات
50000 من حـ / الموردين شركة الصفا
50000 الي حـ / مردودات مشتريات
القيد الثالث
- قيد الحصول علي خصم من المورد والسداد له
50000 من حـ / الموردين شركة الصفا
الى مذكورين
5000 حـ / خصم مكتسب
45000 حـ / نقدية بالخزينة
 • السؤال الخامس عشر : 
قامت شركة السقا يوم3/3 بتصدير كمية 120طن أرز بقيمة 100000 دولار للعميل MARK
ووردت الحصيلة بالبنك يوم 23/3 بصافي مبلغ 99800 دولار بعد خصم مصاريف وعمولات البنك
المطلوب :
القيود المحاسبية علما بان سعر تقويم الدولار 10 جنيه .
الاجابة :
-أولاً : عند التصدير للخارج
1000000 من حـ / عملاء تصدير
1000000 إلى حـ / مبيعات تصدير
( $100000×LE 10 )

- ثانياً : سداد العميل 23-3
عند ورود الحصيله بالصافي
من مذكورين :
998000 حـ / البنك
2000 حـ / مصاريف بنكية
1000000 إلى ح عملاء تصدير

اقرء المزيد

سلسلة سؤال وجواب - 3 - أسئلة محاسبة

• السؤال الثامن :
بتاريخ 27 - 2 تمت العمليات التالية بشركة يوميات محاسب
قام العميل حسين بسداد 15000 جنيه نقداً من المستحق عليه .
قامت شركة يوميات محاسب بسداد مبلغ 10000 نقداً من تحت حساب المورد شركة المحاسب .
قامت شركة يوميات محاسب باعطاء الموظف طه 1000 عهدة مستديمة لمقابلة المصروفات النثرية .
المطلوب : 
اجراء القيود المحاسبية
الاجابة :
- القيد الاول
عند التحصيل النقدي من العميل
15000 من حـ / الخزينة
15000 الى حـ / العملاء ( حسين )

- القيد الثانى
عند السداد النقدي للمورد
10000 من حـ / الموردين ( المحاسب )
10000 إلى حـ / الخزينة

- القيد الثالث
عند اعطاء عهده نقدا لاحد الموظفين
1000 من حـ / العهد ( طه)
1000 إلى حـ / الخزينة


 • السؤال التاسع :
بتاريخ 28-2 قامت شركة يوميات محاسب بصرف المرتبات الشهرية للعاملين
بلغت اجمالي مرتبات الشركة مبلغ 6000 جنيه وتم خصم ما يلي :
300 ضرائب كسب عمل
400 حصة العاملين في التامينات
وتم صرق الباقي نقداً فاذا علمت ان حصة الشركة في التامينات 800 جنيه
المطلوب : 
اجراء القيود المحاسبية

الاجابة :
عند صرف مرتبات نقدا وخصم ضرائب كسب عمل وتامينات واثبات حصة الشركة في التامينات
6800 من حـ / مصاريف عمومية
( 6000 مرتبات  + 800 حصة الشركة في التامينات )
الي مذكورين
300 حـ / ضرائب كسب عمل
1200 حـ / هيئة التامينات الاجتماعية ( 800 + 400 )

5300 حـ / الخزينة

• السؤال العاشر :
بتاريخ 5-3 قامت شركة يوميات محاسب بالعمليات التالية
سداد المستحق للتامينات نقداً وقدره 1200
سداد المستقطع من العاملين كضرائب علي المرتبات وقدرها 300 جنيه نقداً
الحصول علي قرض بنكي بمبلغ 100000 جنيه
المطلوب : 
اجراء القيود المحاسبية
الاجابة :
- عند سداد مستحقات هيئه التامينات نقداً
1200 من حـ / هيئة التامينات
1200 الي حـ / النقدية

- عند سداد ضريبة المرتبات نقداً
300 من حـ / ضرائب كسب عمل
300 الي حـ / النقدية

- عند الحصول علي قرض بنكي واضافته للحساب
10000 من حـ / البنك
10000 الي حـ / قروض

• السؤال الحادى عشر :
بتاريخ 15-3 تم فك الوديعة السابق انشاؤها يوم 15-2 بمبلغ 10000 جنيه
وقام البنك باضافه مبلغ 10100 تمثل قيمه الوديعه بالعائد
المطلوب : 
اجراء القيود المحاسبية
الاجابة :
- عند فك الوديعة واثبات العائد او الفائدة
10100 من حـ / البنك
الي مذكورين
10000 حـ / ودائع
100 حـ /  فوائد دائنة - فوائد ودائع

- سلسلة سؤال وجواب - 3 - أسئلة محاسبة من هنا

اقرء المزيد