الاعتمادات المستندية

الاعتمادات المستندية

Letter of Credit (LC)

يعنى ايه اعتماد مستندى : الاعتماد المستندى ده وسيلة من وسائل الدفع يعنى لما اشترى بضاعة ممكن اسدد حقها بشيك او من الخزنة دى وسيلة زيهم بالظبط بتستخدم فى حالة الاستيراد من برة البلد بس، ليه؟ علشان المورد اللى بره مبيبقاش ضامنك ولا ضامن ظروف بلدك وعايز يضمن حقه انه اول ما يشحنلك البضاعة تبعتله الفلوس فدايما بيطلب منك أنك تسددله بالطريقة دى
طب ازاى؟ من خلال ان بيبقى فى وسيط بينك وبينه يستلم منه مستندات الشحنة ويعتمدها ويتاكد من شحن البضاعة ويستلم منك الفلوس وهو اللى يدي كل واحد حقه .
طب الوسيط ده بقي مين؟ ده البنك بتاعك هو اللى بيقوم بالدور ده انه بيضمنك عنده وبيضمنلك ان المورد مش هياخد فلوس لحد ما مستندات بضاعتك توصل
طب هتيجى تسال وتقول وانا مالى بمستندات البضاعة انا عايز البضاعة
هنا بقي اللى يضمنلك البضاعة شركات التامين بس (البنك مش بتاع بضاعة البنك بتاع مستندات وورقيات بس المستندات سليمة يدفع ويحول الفلوس)
طب مين بقي اللى بياخد منه الفلوس بتاعت البضاعة؟ ده البنك بتاع المورد اللى برة بيبعت للبنك بتاع العميل (المشترى ) مستندات الشحنة ويروح مستلم الفلوس .
من الكلام اللى فات ده نقدر نقول ان اطراف الاعتماد المستندى (4 اطراف):
1 – المشترى (المستورد) وده اللى بيخلى البنك بتاعه يفتح اعتماد مستندى علشان يشترى بضاعة من برة
2 –المورد (المصدر) وده اللى بيبعلى البضاعة
3- البنك (فاتح الاعتماد) وده البنك بتاع المشترى اللى بيفتح الاعتماد المستندى
4- البنك (المراسل) وده بنك المورد اللى بيراسل البنك التانى (اللى هو فاتح الاعتماد) وبيتابع معاه الفلوس هتوصل امتى وبيجهزله مستندات الشحنة

معلومات كده على الماشى :
اولاً : ايه هى مستندات الشحنة اللى بنكررها دى؟ دى عبارة عن المستندات اللى بياخدها البنك فاتح الاعتماد من المورد وبيراجعها وبيعتمدها وعلى الاساس ده بيبتدى يسدد حق البضاعة للمورد .
طب دى عبارة عن ايه؟ اى شحنة فى الدنيا مينفعش ميبقاش فيها المستندات دى:
1 - الفاتورة : ودي الفاتورة اللى بتبقى صادرة من المورد موضحة فيها البضاعة وقيمتها .
2 - شهادة المنشأ : لازم اى بضاعة فى الدنيا يبقى ليها شهادة منشأ اللى بتقول البضاعة دى صنعت فين، يعنى فى انهى بلد، ومين الشركة المصنعة ليها.
3 - بوليصة الشحن : وده المستند اللى بيثبت ان شركة النقل استلمت البضاعة من المورد واستلمتها سليمة ومش معيوبة وبيبقى فيها برده المكان اللى هى استلمت البضاعة منه وهتوديها فين وطبعا البوليصة بيختلف شكلها على حسب نوع الشحن (هل هو برى او بحرى او جوى ).
4 - شهادة الوزن : دى الورقة اللى بتثبت وزن البضاعة كام ودى فحالة البضاعة اللى بيبقى ليها اوزان زى السكر والرز.
5 - بيان التعبئة : ودى اللى بتستخدم فى حالة استيراد كذا سلعة مختلفة فى نفس الشحنة يعنى مثلا استوردت اجهزة منزلية وكهربائية فى نفس الشحنة فالشهادة دى بتقولى الصناديق س,ص,ع فيها اجهزة كهربائية والصناديق أ,ب,ت فيها اجهزة منزلية.
6 - شهادة المواصفات : ودى الورقة اللى بتوصفلى البضاعة عاملة ازاى من حيث (احجامها ومقاستها والوانها ...الخ)
7- شهادة المعاينة : ودى شهادة بتصدر من شركة مختصة فى معاينة البضاعة من حيث حالتها ومواصفتها وبتم المعاينة وهى الشحنة فى المينا خارج المخازن علشان بعد المعاينة ما تخلص والشهادة تطلع ميجيش المورد يلعب فيها ومغير البضاعة واهميتها ان المستورد (المشترى)يطمن على البضاعة اللى اشتراها.
8 - الشهادة الصحية : ودى الشهادة اللى بتستخرج من وزارة الصحة بتاعت البلد المصدرة واللى بتثبت ان البضاعة دى صالحة للاستخدام الادمى وغير منتهية الصلاحية والشهادة دى بتستخدم فى حالة السلع الغذائية ( اللحوم , المشروبات ,الالبان )
هى دى بقى مستندات الشحنة ولازم تكون كاملة مكملة علشان البنك يعتمدها ويضمنك عند المورد ويدفعلك فلوسها .

فيه انواع للاعتمادات المستندية ؟ اه طبعا
اولاً : من حيث قوة الاعتماد :
يعنى ايه من حيث قوته : يعنى الاعتماد بيادى دوره اللى هو (وسيلة السداد مع وجود الضمانات الكافية للطرفين) بشكل فعال وقوى ولا لأ
بس فى قوتين: القوة الاولى هى قوة البنك (فاتح الاعتماد) :
وهنا هيبقى ف نوعين من الاعتماد:
1 – اعتماد قابل للالغاء : ومن خلاله بيقدر البنك (فاتح الاعتماد) انه يلغى الاعتماد فى اى وقت دون الرجوع للمستفيد اللى هو المورد وده فى الحياة العملية مش موجود علشان ضعيف جدا وبيضمنش حقوق حد .
2– اعتماد غير قابل للالغاء : وده محدش يقدر يلغيه الا بتراضى المستفيد (المورد او المصدر) والمستورد وده اللى معمول بيه دلوقتى.
القوة التانية وهى قوة البنك المراسل (بتاع المورد):
برده فى نوعين :
1- اعتماد معزز: وده معناه ان البنك المراسل بيعزز ضمان البنك فاتح الاعتماد وبيضمن هو كمان انه يسدد للمورد فلوسه.
2- اعتماد غير معزز : وده العكس انه مش بيعزز ضمان البنك فاتح الاعتماد وبيبقى البنك فاتح الاعتماد هو الضامن الوحيد.
ثانياً : من حيث طريقة الدفع للبائع (المورد) فيه 3 انواع للاعتمادات :
1- اعتماد الاطلاع : يعنى البنك فاتح الاعتماد بيتطلع على مستندات الشحنة ويتاكد من صحتها يروح مسدد علطول للمورد .
2- اعتماد القبول : يعنى المورد بيكتب كمبيالة على البنك فاتح الاعتماد او البنك المعزز (المراسل) بقيمة البضاعة وبيكون تاريخ استحقاقها مؤجل لفترة زمنية (يتم الاتفاق عليها فى العقد) من تاريخ الفاتورة وبيقدمها المورد ضمن المستندات بتاعت الشحنة ويبقى البنك (فاتح الاعتماد) اوالبنك المعزز (المراسل) احداهما مطالب بسداد الكمبيالة فى ميعادها .
3- اعتمادات الدفعات المقدمة : يعنى المورد اللى هو المستفيد بيكون محتاج دفعة من قيمة الاعتماد علشان يقدر يمول باقى البضاعة للعميل (المشترى) فبياخد الدفعات وبتتخصم من قيمة الفاتورة بعد كده .
ثالثاً : من حيث طريقة سداد المشترى هناك 3 انواع من الاعتمادات:
1- اعتماد مغطى كليا : يعنى المشترى هو اللى بيشيل تمن البضاعة (اللى هو قيمة الاعتماد) كله والبنك مبيدهوش تسهيل فى اى حاجة وبيتخصم قيمة الاعتماد بالكامل من رصيد المشترى لدى البنك
2- اعتماد مغطى جزئيا : يعنى المشترى بيشيل جزء من تمن البضاعة (اللى هو قيمة الاعتماد) بيتخصم من رصيده بالبنك والبنك بيمول المشترى بباقى القيمة بتاعت الاعتماد وطبعا البنك بياخد مصاريف وعمولة على الجزء اللى هيموله للعميل غير طبعا الفوائد اللى بيحسبها على العميل لغاية ما يسدد قيمة التمويل ده .
3- اعتماد غير مغطى : يعنى المشترى مبيتخصمش حاجة من رصيده فى البنك والبنك بيموله قيمة الاعتماد بالكامل وده طبعا بيبقى متوقف على مدى التسهيلات اللى مدهاله البنك وبيتعامل نفس معاملة الجزء الغير مغطى فى النوع رقم (2) .
رابعاً : الاعتمادات من حيث الشكل :
1- اعتماد قابل للتحويل : يعنى اعتماد نقدر نحوله من مستفيد لمستفيد اخر (من مورد لمورد اخر) وده بنستخدمه فى حالة اذا كان المورد الأول مجرد وكيل للمورد الاصلى فبيتم تحويل الاستفاده من الوكيل ده ونحولها الى المورد الاصلى اللى هو المصدر الرئيسى للمنتج ده.
2- اعتماد متجدد : يعنى اعتماد بيفضل مفتوح بين المستورد والمصدر مش مقتصر على عملية بيع وشراء معينة ويتم تجديد قيمته تلقائيا مع كل مستندات شحنة جديدة بيقدمها المستورد للبنك فاتح الاعتماد والاعتماد ده بيستخدم فى حالة العملاء الكبار اللى استيرادهم لسلع معينة بتكون بشكل مستمر ودورى.
3- الاعتماد الظهير (اعتماد مقابل اعتماد) : وهو اعتماد بيفتحه الوكيل للمنتج الاصلى للبضاعة (المصنع)مقابل الاعتماد الاول اللى معمول من المشترى للوكيل وده فى حالة رفض المشترى او المستورد فتح اعتماد قابل للتحويل فالوكيل يروح فاتح اعتماد للمصدر الرئيسى (المنتج الاصلى ) مقابل الاعتماد الاولانى .
نيجى بقى ونقول ايه هى خطوات فتح الاعتماد المستندى :
1- فى الاول بيتفق العميل (المستورد) والمورد (المصدر) على كل حاجة (البضاعة – سعرها – مواصفتها – ميعاد شحنها – طريقة دفعها (وهى الاعتماد المستندى)
ودى بتبقى فاتورة اولية للحاجة اللى هيستوردها العميل . (Pro forma invoice2- لما بيتفقوا بيطلب المستورد من المصدر فاتورة مبدئية ) .
3 - العميل بيستلم الفاتورة الاولية ويروح مسلمها للبنك بتاعه علشان البنك يفتح الاعتماد المستندى ويخصم بقى المصاريف والعمولات الخاصة بالاعتماد .
4 – البنك بيدى اشعار لبنك (المصدر – المراسل) انه فتح الاعتماد لصالح العميل بتاعه ساعتها المصدر يبتدى يجهز فى ورق الشحنة (اللى هى مستندات الشحنة) ويروح باعتها للبنك بتاع العميل (المستورد) واول ما توصل للبنك ويتاكد من صحة الاوراق يروح محول الفلوس للمورد (المصدر) . 

إعداد محاسب / محمد محسن

اقرء المزيد

خطابات الضمان

خطابات الضمان
(Letter OF Guarantee)
يعنى ايه خطاب ضمان، قبل ما نعرف معنى خطاب ضمان لازم نعرف الاول ان اى معاملة تجارية (يعنى اى عمليه بيع وشراء) لازم بتتكون من طرفين (بايع ومشترى ) البايع بيورد بضاعة او بيقدم خدمة او بياخد مقاولة (بضاعة وخدمة) والمشترى بيدفع تمن البضاعة او الخدمة او المقاولة ، طب البايع بيضمن ان المشترى يدفعله فلوسه ازاى ؟ 
فى كذا طريقة (شيك – كمبيالة –اعتماد مستندى لو تصدير ) نيجى بقى للمشترى بيضمن ازاى ان المورد يوردله البضاعه اللى اتفقوا عليها او يقدمله الخدمة او ينفذ المقاولة (علشان حقه برده ان يضمن الحاجات دى ؟!) بيضمنها ازاى بقى (عن طريق خطاب الضمان)
يبقى خطاب الضمان : وسيلة بيضمن بيها المشترى ان البايع يلتزم بوعوده وينفذ اللى اتفقوا عليه سواء (توريد او خدمة او مقاولة )او اى حاجة اتفقواعليها والبايع ملزم انه ينفذها طب مين بقى اللى بيضمن للمشترى الكلام ده ؟ لازم يكون حد قوى حد يقدر يضمن البايع انه ينفذ ولو منفذش يبقى ملتزم قدام المشترى انه يديله حقه واللى يقدر يعمل كده لازم يكون مسيطر على البايع وعلى فلوسه او على جزء من فلوسه ومين ده بقى اللى بتتوافر فيه كل ده (هو بنك البايع ).
يبقى لو قولنا مفهوم خطاب الضمان بشكل تانى : هو ورقة بتطلع من بنك البايع (المورد يعنى) بيضمن فيها العميل بتاعه عند الشخص المستفيد اللى هو المشترى، وبيتعهدله ان العميل بتاعه اللى هو البايع هينفذ الاتفاق اللى ما بينهم وان لو منفذش الاتفاق المشترى يروح بالورقة دى للبنك ويصرف قيمتها كاملة من البنك زيه زى الشيك بالظبط .
طب من الكلام اللى فات نقدر نقول مين هما أطراف خطاب الضمان؟ 3 أطراف بس وهما:
1- الآمر بفتح خطاب الضمان : اللى هو المورد (البايع) اللى بيقوم بفتح خطاب الضمان وفقا لطلب المشترى (العميل) .
2- المستفيد : اللى هو المشترى (العميل) اللى طلب انه يتفتحله خطاب الضمان .
3- البنك : اللى هو بيضمن البايع وهيسدد الملبغ لصالح العميل لو الاتفاق متنفذش .

نيجى بقى ونقول ايه هى خطوات فتح خطاب الضمان :
1- اول حاجة المشترى (العميل ) بيبعت طلب للبايع (المورد ) بيطلب فيه بفتح خطاب ضمان بقيمة معينة (بتكون نسبة من تمن المناقصة او من الخدمة – بتختلف على حسب نوع الخطاب وعلى حسب العقد ) وهو عايز يفتحه لضمان ايه بالظبط (الجدية – حسن التنفيذ- الصيانة (خدمة ما بعد البيع)) ولمدة اد ايه والكلام ده ممكن يكون فى امر التوريد او فى العقد او فى كراسة شروط او طلب خاص .
2- تانى حاجة البايع (المورد) ياخد (امر التوريد او العقد او كراسة الشروط) الحاجة اللى بتوضح سبب فتح خطاب الضمان ويرفقه بالطلب اللى هيوديه للبنك بتاعه بيطلب فيه من البنك انه يفتح خطاب الضمان بالشروط اللى اتفق فيها مع العميل (المشترى) .
3- البنك بقى بياخد الطلب من المورد (البايع) ويراجعه مع المرفقات ويصدر خطاب ضمان لصالح المشترى (العميل)، اول ما البنك بيصدر خطاب الضمان بيخصم قيمته من حساب البايع (المورد) او بيخصم جزء من قيمته (الجزء اللى بيتخصم من حساب المورد (البايع) سواء كان بكامل قيمة الخطاب او بجزء منه ده بيتسمى غطاء خطاب الضمان او تامين خطاب الضمان ) يعنى الجزء اللى بيغطيه العميل من الخطاب وبيتخصم من حسابه طب بالنسبة بقى للجزء اللى مبيتخصمش من الحساب ده بيبقى تسهيل من البنك للعميل بتاعه اللى هو (المورد- البايع) وحجم التسهيل ده بيتوقف على حاجات كتير (مركز العميل فى السوق – موقفه المالى – حجم نشاطه – اتسيله خطابات ضمان قبل كده ولا (اتسيله يعنى المورد منفذش وعوده والتزاماته فراح المشترى صرف خطاب الضمان من البنك ) وفقا للحاجات دى البنك بيحدد هيخصم من العميل كام وهو هيسهله فى كام يعنى لو خطاب ضمان بقيمة 10000جم ووفقا لمعطيات البنك قالت ان العميل هيشيل 70% فيبقى كدة العميل هيتخصم من حسابه ال 7000 جم (غطاء خطاب ضمان) والبنك هيسهله فى 3000 (هيسهله مش معناها ان البنك هيشلها عنه او هيدفعاله لو جه المشترى يصرف خطاب الضمان ) (مفيش بنك بيخسر او بيتعامل لله وللوطن :) ) هو مجرد بيديله ميزه انه مش هيخصم ال 10000 كلهم بيخصم جزء منها طول ما انت بتنفذ اللى اتفقت عليه مع العميل وما اخلتش بوعودك فبالتالى العميل مش هيقدم الخطاب للبنك علشان يصرفه. ولكن افرض بقى اخليت بوعودك والتزاماتك والعميل هيصرف الخطاب اللى انت متحمل منه تلقائيا 7000جم هيروح البنك خاصم منك بقية قيمة الخطاب اللى هى 3000 جم ويدى قيمة الخطاب كله ال(10000) للعميل . 
معلومات كده على الماشى:
اولاً : البنك بيستفاد ايه لما بيضمنك عند العميل (المشترى)؟
البنك طبعا لازم يكون مستفيد (مصاريف وعمولات بياخدها على كل خطاب ضمان بيطلع وعلى كل تعديل بتعمله على خطاب الضمان )
ثانياً : ايه هى محتويات خطاب الضمان ؟ يعنى مضمون ورقة خطاب الضمان؟
رقم الخطاب - تاريخ الاصدار - نوع الخطاب - اسم المستفيد وعنوانه - الغرض من اصدار الخطاب - قيمة الخطاب - تعهد من البنك بدفع قيمة الخطاب للعميل لو الاتفاق متنفذش – تاريخ انتهاء الخطاب - توقيع مسئول البنك وختم البنك .
ثالثاً : مدة خطاب الضمان؟
مفيش مدة محددة بتختلف من عملية للتانية ومن عميل للتانى ومن نشاط لنشاط للتانى فى شركات بتطلبها سنة وفى ناس بتطلبها3شهور او نص سنة .
رابعاً : فى انواع من خطابات الضمان ولا؟
طبعا ليه انواع واشهر 5 انواع :
1 - خطاب ضمان ابتدائى : يعنى ايه؟ وده من اسمه انه بيتعمل فى البداية خالص فى بداية التعامل بين البايع والمشترى ,فالمشترى بيكون عايز يعرف مدى جدية البايع وهل هو فعلا جاهز للتعامل ولا لأ وده بيستخدم فى مجال المقاولات والتوريدات بحيث ان المقاول او المورد بيعمل خطاب ضمان للعميل علشان يثبت جديته وانه عايز يعمل الشغلانة دى وده بتبقى نسبته (1% للمقاولات و 2% للتوريدات) من قيمة المناقصة.
2- خطاب ضمان دفعات مقدمة : وده بعد ما بترسي المناقصة على مورد معين بيطالبه العميل بانه يلغى خطاب الضمان الابتدائى ويبدله بخطاب ضمان دفعة مقدمة طب يعنى ايه خطاب ضمان دفعة مقدمة ؟ فى نظام المقاولات والتوريدات بيبقى المفروض على العميل اللى هو المشترى انه يسدد كل فترة دفعة تحت الحساب للمورد علشان المورد يعرف يشتغل ويعرف يجيب خامات يشتغل بيها فالمشترى بيطلب خطاب ضمان من المورد مقابل الدفعة تحت الحساب اللى بيدفعها بنفس القيمة بالظبط علشان لو المورد منفذش المقاولة او العملية يضمن ان يرجعله قيمة الدفعة المقدمة اللى دفعها وده بتبقى نسبته (مش ثابته على حسب امر التوريد والاتفاق المبرم).
3 - خطاب ضمان نهائي : وده علشان يضمن بيه العميل حسن التنفيذ من قبل المورد وانه ينفذ زى ما اتفقوا وفى الميعاد اللى اتفقوا عليه وده برده نسبته (مش ثابته وعلى حسب امر التوريد والاتفاق المبرم ) .
4 - خطاب ضمان الصيانة : وده خطاب ضمان بيطلبه العميل من البايع اللى بيقدمله خدمة صيانة على حاجة، يعنى مثلا شركة محمد عملت صيانة لاجهزة الكمبيوتر بتاعت شركة احمد فشركة احمد عايزة تضمن ان الاجهزة دى لو حاصلها اى حاجة شركة محمد تيجىتعملها صيانة للأجهزة بمعنى اصح بتضمن (خدمة ما بعد البيع ).
5 - خطاب الضمان الجمركى : وده من اسمه بيبقى خطاب ضمان لمصلحة الجمارك علشان تضمن أنك هتسددلها الرسوم الجمركية والضرايب المستحقة اللى مفروض تدفعها على البضائع اللى انت مستوردها او ممكن يتعمل بشكل مؤقت ازاى يعنى(في شركات بتستورد بضائع بغرض انها تبيعها لجهات معفاه من الضرايب او انها تعدل فيها حاجات وترجع تصدرها برة البلد ، في الحالتين دول الجمارك مبتفرضش عليك رسوم جمركية او ضرايب بس هي عايزة تضمن فعلا انك هترجع تصدرها تانى او تبيعها لجهة معفاه علشان في شركات كتير بتستغل النقطة دى علشان متدفعش فالجمارك بتروح واخدة منك خطاب ضمان بقيمة الرسوم والضرايب لحد ما تتاكد انك هترجع تصدر او تبيعها لجهة معفاه وتروح لاغية الخطاب علشان كدة احنا قولنا عليه مؤقت ) .

 إعداد محاسب / محمد محسن

اقرء المزيد

المدين والدائن والقيد المحاسبى 2

-  يعنى ايه مدين ويعنى ايه دائن :
احنا قولنا ان اى معاملة بيبقى ليها طرفين او اكثر اطراف بتدى واطراف بتاخد ، المحاسبة بقى بتسميهم مدين ودائن طب بعرفها ازاى ،اعرف منين مين هو الطرف المدين والطرف الدائن ؟ فى طريقتين بيكملوا بعض ومن خلالهم نقدر نحدد مين هو الطرف المدين ومين هو الطرف الدائن .

- الطريقة الاولى : الطريقة البلدى بمعنى اصح :
الطرف اللى بياخد بيزيد باللى خده يبقى مديون باللى خده وزاد بيه للشخص اللى اداه يبقى مدين .
الطرف اللى بيدى بينقص باللى اداه يبقى مداين الشخص اللى خد منه باللى ادهوله ونقص بيه يبقى داين او دائن .
مثال 1:
محمد ادى لأحمد 50 ج :
يبقى محمد هو اللى ادى الـ50 ج يعنى هو اللى نقص فبقى هو اللى مداين احمد بال 50 ج يبقى محمد دائن ( العاطى )
واحمد خد 50ج من محمد يعنى فلوسه زادت ب50 ج فبقى مديون لمحمد بقيمة ال50 ج اللى خدها منه  و هيبقى أحمد مدين ( الآخد ).
مثال 2 :
شركة (يوميات محاسب) ادت شركة (المحاسب) بضاعة على الحساب (يعنى مدفعتش فلوسها ) (يعنى خدت البضاعة وهتدى فلوسها بعدين)
لازم تاخد بالك جدا جدا : فى علم المحاسبة مينفعش اقول انا الشركة اللى انا زادت او قلت لا انا بشوف ايه الطرف اللى زاد فى الشركة (يعنى ايه الحاجة اللى جوة الشركة ) زادت وايه الحاجة اللى قلت جوة الشركة .
فى المثال ده شركة (يوميات محاسب) باعت بضاعة لشركة (المحاسب) على الحساب دلوقتى عايزين نحدد مين الطرف المدين والطرف الدائن فى كل شركة :
اولاً : لو انت محاسب فى شركة (المحاسب) :
ايه الطرف المدين : الشركة دلوقتى اشترت بضاعة والبضاعة بتتحط فى المخزن يعنى المخزن زاد بقيمة البضاعة اللى اشتريتها يبقى مديون بقيمة البضاعة دى يبقى المخزن هو الطرف المدين .
ايه الطرف الدائن : دلوقتى شركة (يوميات محاسب) ادت البضاعة للشركة يعنى شركة (يوميات محاسب) قلت ونقصت باللى ادته تبقى مداينة الشركة يبقى شركة (يوميات محاسب) هى الدائن .
ثانياً : لو انت محاسب فى شركة (يوميات محاسب) : 
ايه الطرف المدين : دلوقتى الشركة باعت بضاعة لشركة (ٍالمحاسب) يعنى شركة (المحاسب) هى اللى خدت وزادت بقيمة البضاعة اللى خدتها فبقت مديونة بالقيمة دى فشركة (المحاسب) هى الطرف المدين.
ايه الطرف الدائن : دلوقتى الشركة باعت البضاعة للشركة (المحاسب) يعنى المخزن بتاع الشركة نقص بقيمة البضاعة اللى طلعت منه يبقى مداين شركة (المحاسب) بالبضاعة يبقى المخزن دائن .

ويبقى كدة ملخص الطريقة الاولى ان (الطرف اللى بياخد بيزيد باللى خده ومديون بقيمة اللى خده للطرف التانى يعنى مدين له ، والطرف الى بيدى بينقص باللى اداه وبيبقى مداين الطرف التانى باللى ادهوله يعنى دائن ) . 
الطريقة التانية : الجدول السحرى
دلوقتى احنا قولنا ان المحاسبة بتقسم جميع الحسابات (الاطراف يعنى ) الى 4 اقسام رئيسية وهما (الاصول والإلتزامات والمصاريف والايرادات)
1- اى حساب (طرف) تبع الاصول طبيعته مدينة ، المعاملة اللى حصلت عليه زودت قيمته فى الشركة يبقى هو مدين فى المعاملة دى يعنى مدين فى القيد ، المعاملة اللى حصلت عليه نقصت قيمته فى الشركة يبقى هو دائن فى المعاملة يبقى دائن فى القيد .
2 –اى حساب (طرف) تبع الإلتزامات طبيعته دائن ، المعاملة اللى حصلت عليه زودت قيمته( قيمة الخصوم يعنى او الالتزامات ) فى الشركة يبقى هو دائن فى المعاملة دى يعنى دائن فى القيد ، المعاملة اللى حصلت عليه نقصت قيمته فى الشركة يبقى هو مدين فى المعاملة يبقى مدين فى القيد .
3 - اى حساب (طرف) تبع المصروف طبيعته مدينة ، المعاملة اللى حصلت عليه زودت قيمته فى الشركة يبقى هو مدين فى المعاملة دى يعنى مدين فى القيد ، المعاملة اللى حصلت عليه نقصت قيمته فى الشركة يبقى هو مدين برده فى المعاملة يبقى مدين برده فى القيد (المصروف قل او زاد بيفضل مدين )
مثال :
يعنى عندى مصروف الكهرباء فى شهر يناير قيمته 200جـ فهو مدين ، فى شهر فبراير قل وبقى 100جـ هيفضل برده مصروف واتدفع يعنى (مدين ).
4 - اى حساب (طرف) تبع الايرادات طبيعته دائنة ، المعاملة اللى حصلت عليه زودت قيمته فى الشركة يبقى هو دائن فى المعاملة دى يعنى دائن فى القيد ، المعاملة اللى حصلت عليه نقصت قيمته فى الشركة يبقى هو دائن برده فى المعاملة يبقى دائن برده فى القيد (الايراد قل او زاد بيفضل دائن )
مثال :
يعنى عندى ايراد بيجى من ايجار محل فى شهر يناير اجرته ب 500ج فهو دائن ، فى شهر فبراير اجرته ب 300ج هيفضل برده ايراد وجالى يعنى (دائن).
وده شكل الجدول السحرى :

 

 بعد ماخلصنا الطريقتين لازم تعرف انهم بيكملوا بعض ولازم النتيجة تبقى واحدة الطرف (الحساب) اللى بطلعهولك اى طريقة مدين لازم الطريقة التانية تطلعهولك مدين مينفعش تطلعه داين (مستحيل ) ونفس الكلام للحساب (الطرف ) الدائن .

يعنى ايه (من حـ - إلى حـ)
اولا ال (حـ) دى اختصار لكملة حساب يعنى بقول من حساب كذا او الى حساب كذا ، طب امتى بحط (من) اومتى بحط (الى) ؟
اى طرف مدين بحط قبليه (من) ، واى طرف دائن بحط قبليه (الى) (هى تتحفظ كده :) ) .
معلومة على الماشى
من حـ / الى حـ بتستخدم بس فى المحاسبة اليدوية (محاسبة الدفاتر) وبنسبة 99 % مفيش شركات دلوقتى شغالة دفتريا كل الشركات بتشتغل الشغل بتاعها عن طريق برامج محاسبية ودى بقى انواعها كتييييييييييير جدا وبقت تسهل كتير على المحاسب (البرامج دى مفهاش حتة (من حـ) و(الى حـ)) ، المحاسب بقى يختار الحساب او الطرف ويحط قيمته مدين او دائن على حسب هو عايز ايه .

- دلوقتى بعد ما شرحنا قيد اليومية ويعنى ايه مدين ودائن وازاى تحدد مين هو الطرف المدين والطرف الدائن ، ايه بقى الخطوات اللى تعملها علشان تعمل اى قيد يقابلك ؟
1- لازم تكون ملم بجميع الحسابات ( اللى هى الاطراف ) اللى بتتعامل معاها الشركة يعنى عارف شجرة الحسابات بتاعت الشركة كويس ودى بتيجى من الخبرة وبمرورك على شركات كتير مختلفة المجال ولازم تعرف كل حساب من الحسابات بيعبر عن انهى طرف من الاطراف .
2 – لازم تعرف تاريخ المعاملة علشان تعرف هتعمل القيد بتاعك فى اى شهر (مينفعش تكون المعاملة مثلا فى مارس وانت تعملها فى ابريل او تعملها فى فبراير)علشان لازم تكون البيانات اللى بتقدمها لاصحاب الشركة تكون صح ومش مغلوطة .
3– لازم تعرف اطراف اى معاملة : ودى بتحصل لما تقرا المعاملة كويس وتشوف ايه الاطراف (الحسابات ) اللى هتتاثر بالمعاملة دى (ايه الاطراف اللى هتزيد وايه الاطراف اللى هتقل نتيجة المعاملة دى ) 
مثال :
الشركة دفعت اجور، يبقى مين الاطراف اللى اتاثرت : اولا الاجور ده مصروف من ضمن المصاريف اللى بتدفعها الشركة ودفعت اجور يبقى مصروف الاجور ده زاد ويبقى ده اول طرف ، طب هى دفعت الفلوس دى عن طريق ايه ؟ دفعتها عن طريق البنك يبقى البنك نقص يبقى ده الطرف التانى فى المعاملة ، وهكذا .
بعد ما حددت الاطراف لازم تحدد مين الطرف المدين ومين الطرف الداين وده زى ماشرحنا فوق بنحدده ازاى .
4 – لازم تعرف قيمة المعاملة يعنى الطرف اللى زاد زاد بكام والطرف اللى قل نقص بكام ،يعنى لو فى المثال اللى فوق قالك ان الشركة دفعت اجور 200,000.00 يبقى مصروف الاجور زاد بال 200,000.00 والبنك نقص بنفس القيمة 200,000.00.
وبكدة يبقى انت تقدر تعمل اى قيد .
مثال :
فى 15 / 1 دفعت الشركة ايجار المكتب ب2000 ج ودفعت رسوم نظافة ب200 ج والكهرباء ب 350 ج من خزينة الشركة .
هتمسك المعاملة بقى زى ما احنا ما قولنا :
اولا : هتبص على تاريخ المعاملة وهى 15 / 1 يعنى كدة هتعمل القيد فى شهر يناير ،
ثانيا : بيقولك ان الشركة دفعت مصاريف من خزينة الشركة والمصاريف عبارة عن (ايجار , نظافة , كهرباء) وقالك دفع المصاريف دى من خزينة الشركة يبقى ايه هى الاطراف اللى اتاثرت بالمعاملة : 
1- مصروف الايجار , 2- مصروف النظافة , 3 – مصروف الكهرباء , 4 – خزنة الشركة
ثالثا : عايز اعرف مين المدين ومين الدائن ؟
هعملها بطريقة الجدول السحرى وانت اعملها بالطريقة البلدى
المصاريف دى احنا قولنا ان طبيعتها مدينة ولما بتزيد او بتقل فبتفضل مصروف يعنى مدينة وهنا المصاريف زادت يبقى ال 3 مصاريف (مدين )
خزينة الشركة دى اصل من الاصول علشان دى فلوس بتاعت الشركة وتمتلكها واحنا قولنا ان الاصول طبيعتها مدينة ولو زادت هتفضل مدينة ولو نقصت هتبقى دائنة
وهنا هى خرجت منها فلوس يعنى نقصت يعنى (دائنة) ،يبقى كدة عندى 3 اطراف مدينة وطرف دائن
رابعا : قيمة الاطراف عندنا اول طرف الايجار زاد ب2000 ج , تانى طرف النظافة ب200 ج , تالت طرف الكهرباء زاد ب 350 ج , رابع طرف بقى الخزنة دفع مصروف الايجار ومصروف النظافة ومصروف الكهرباء يعنى نقص ب2000 + 200 +350 يعنى نقص ب2550
ويبقى شكل القيد كده
من مذكورين (علشان فى كذا طرف مدين)
2000 حـ / مصروف الايجار
200 حـ / مصروف النظافة
350 حـ / مصروف الكهرباء
       2550 الى حـ / خزينة الشركة
ويكون شرح القيد (دفع مصاريف الكهرباء والايجار والنظافة من خزينة الشركة)
(الشرح بمزاجك بس اهم حاجة يكون معبر عن المعاملة)
خلى بالك :
1- ان مجموع الاطراف المدينة = مجموع الاطراف الدائنة = 2550 (لازم اطراف القيد (المدين والدائن )تكون متساوية) .
2 – محطناش (من حـ )فى الجانب المدين علشان فى اكتر من طرف مدين فكلمة (من مذكورين ) بتغنى عن كملة (من حـ) ونفس الكلام لو كان فيه اكتر من طرف داين .

 إعداد محاسب / محمد محسن

اقرء المزيد

المدير المالي ومهامه ليكون ناجح ومتميز

يعتبر أهم معيار من معايير النّجاح في كلّ شركة هو نجاح مديرها المالي أو فشله.
المدير المالي : هو الشّخص المسؤول مالياً في الشّركة أمام مجلس الإدارة، وعليه يترتب معرفة كل صادرة وواردة في المؤسسة بحيث يكون هو من لديه التبريرات في الميزانيّات النهائيّة والحسابات الختاميّة في الشركة، ووضع دراسات الجدوى وإدارة المصادر الماليّة.
مهام المدير المالي الناجح:
- إنشاء علاقة مالية قويّة وراسخة بين الشركة والمتعاملين مع الشركة. 
- إعداد التقارير الماليّة والحسابات الختاميّة للشركة.
- إعداد التقارير الماليّة الدورية والطارئة وقائمة المركز المالي للشركة وعرضه على مجلس الإدارة.  
- إعداد قائمة التدفّقات النّقدية .  
- التأكّد من دقّة أرصدة الحسابات وصحّة سير العمليّات.  
- وضع الأنظمة والقوانين والأصول المحاسبيّة في الشركة ومراجعتها وتدقيقها.  
- وضع الخطط الاستراتيجية الماليّة وتقييمها وعرضها على مجلس الإدارة لإعتمادها.  
- تقييم المعاملات الماليّة ذات الحجم الكبير وأثرها على الشركة في حال تنفيذها.  
- اعتماد مصادر التّمويل الأفضل للشركة وعرضها على الإدارة مع تبيان وتوضيح لمزايا وعيوب المصادر وأثرها على الشركة مستقبلاً.  
- اختيار موظفي الدائرة الماليّة واختبارهم وتحديد مستوى قدراتهم الماليّة والعقليّة.  
- إعداد دراسات الجدوى للمشاريع التي تنوي الشركة والعمل عليها وإيضاح جديتها.  
- إعداد الموازنة العامة والموازنة التشغيليّة عن الفترة الزمنيّة القادمة وحتّى نهاية السّنة المالية.  
- متابعة الموازنة طوال فترة السّنة الماليّة وتعقّب الخلل والعجز فيها وتفادي الأخطار التي قد تلحق الدّمار بالشركة.  
- إيجاد التبريرات المناسبة والمقنعة في حالات العجز المالي أو الخلل الذي قد يطرأ خلال العمل.  
- إعداد سياسة الجرد وآلية العمل عليها واعتمادها والإشراف على تنفيذها.  
- توزيع الأرباح أو تحديد الخسائر على الشّركاء وإعداد كشوفات الحسابات لكل المساهمين. - الموافقة على الدّفعات الكبيرة والتي تحتاج إلى سيولة كبيرة.  
- متابعة أرصدة البنوك والسّندات والأسهم وتحضيرها وعمل التقارير الخاصة بها.

إعداد أستاذ /  Bassel Zeino

اقرء المزيد

بضاعة الامانة لدى الغير

فى الاول لازم تعرف الشركات بتبيع منتجاتها ازاى بتوصل منتجاتها ازاى للعميل ، الشركات بتبيع منتجاتها بكذا طريقة زى :
1- الشركة بتبيع منتجاتها بنفسها للعميل يعنى هى اللى بتصنع (لو شركة صناعية ) وهى اللى بتسوق وهى اللى بتبيع لحد المستهلك اللى بيستفاد من السلعة.
2- شركة تانية بتبيع منتجاتها لوسطاء وهما اللى يبيعوا وبيتعاملوا مع المستهلك علطول ودول اسمهم (تجار جملة وتجزئة ) .
3- شركة بتصنع بس مبتعرفش تبيع او منتاجتها لسة جديدة فمعنداش القدرة انها تسوقها (محتاجة شركة تانية تعرف تسوقها) او مش عايزة تتكلف تكلفة كبيرة (اجور موظفين او ايجار محلات او اى مصاريف تانية بتتصرف على المكان اللى بتبيع منه للناس زى كهرباء ، مياة ،الخ).
النوع التالت ده بقى بيروح مدى منتجاته اللى هى (بضاعته) لناس تانية هى اللى تبعهاله وتاخد منه عمولة مقابل الخدمة دى ومياخدش منها فلوس غير لما البضاعة دى تتباع ولو فى جزء من البضاعة متباعش يتردله تانى ، طب حد يسال هو بيبيع البضاعة للناس دى ؟! لا طبعا هو بيدهالهم كدة بصفة امانة لحد ما يبعوها ، طب حد تانى يسال : ما هو ممكن يضحكوا عليه وياخدوا البضاعة دى ويبعوها لنفسهم ؟! لا علشان الشركة دى بتاخد من الناس دول مبلغ تامين مقابل البضاعة اللى بياخدوها منه فلو حصل اى غدر منهم هو يروح يصرف مبلغ التامين . وهى دى( بضاعة الامانة لدى الغير)
يبقى من الكلام اللى فات ده نقدر نقول ان بضاعة الامانة لدى الغير هى : بضاعة بتحطها الشركة عند ناس تانية بصفة امانة علشان يبعوها مقابل انهم ياخدوا عمولة ( نسبة من المبيعات) والشركة بتاخد مقابل البضاعة دى مبلغ تامين مساوى لقيمة البضاعة علشان تكون مأمنة نفسها .
الناس دى بقى اللى الشركة بتديهم بضاعتها علشان يبعوها دول اسمهم ايه ؟ (دول اسمهم وكلاء او موزعين ) .
يبقى الوكيل او الموزع : دول شركات بتبيع منتجات لشركات تانية باسمهم مقابل انها بتاخد عمولة
معلومات كدة على السريع :
1- اطراف بضاعة الامانة هما طرفين (الشركة والوكيل بتاعها ).
2- البضاعة اللى معرفش الوكيل يبيعها بيردها تانى للموكل (الموكل هو الشركة صاحبة البضاعة).
3 - لازم يكون فى عقد بين الطرفين (الوكيل والموكل ) بيحكم كل حاجة بينهم (يعنى لو البضاعة معيوبة مين الل هيلبسها ، لو عميل مدفعش الفلوس اللى عليه مين اللى يشيلها ، نسبة العمولة ، غرامات التاخير ) وهكذا .
بعد ما خلصنا شرح بضاعة الامانة ، فى سؤال مهم : بضاعة الامانة لدى الغير تعتبر اصول ولا خصوم ولا ايراد ولا مصروف؟
بضاعة الامانة دى بضاعة بتاعتى انا بمتلكها وليا الحق الكامل فى التصرف فيها بس بديها لحد يبعهالى وياخد عمولة يعنى بتتوافر فيها صفات الاصول علشان كدة هى(تعتبر اصل من اصولى ) .

نيجى بقى للمعالجة المحاسبية :
اولاً : المعالجة المحاسبية فى دفاتر الموكل (صاحب البضاعة) :
احنا قولنا ان صاحب البضاعة بيدى البضاعة بتاعته بشكل امانة (يعنى مش بيبعها ) (كانه بينقلها من مخزن لمخزن ) فبيوديها عند الوكيل بسعر تكلفتها فاول ما البضاعة بتخرج من المخزن بتاعى وتروح لمخزن الوكيل ببتدى اثبت بضاعة الامانة ، طب بثبتها ازاى فى الدفاتر ؟ فى الاول اللى زاد عندى بضاعة الامانة (اللى هى اصل من اصولى ) (يعنى اصل بيزيد) يبقى مدين طب ايه اللى قل المخزن بتاعى (اصل بيقل ) يعنى دائن ويبقى القيد كده :
من حـ / بضاعة امانة لدى الغير (بسعر تكلفتها علشان انا مبعتهاش )
الى حـ / المخزن (اللى خرجت منه البضاعة )
بنسبة 99% محدش بيدى بضاعته كدة من غير لما ياخد ضمانات للبضاعة (اللى هو مبلغ التأمين) وده مبلغ بيدفعه الوكيل لصاحب البضاعة مقابل بضاعة الامانة فلما بيدفعها بيكون القيد كده فى دفاتر الموكل :
اللى زاد وخد الفلوس هو البنك (يعنى اصل زاد) يعنى مدين فى حاجة تانية زادت ؟ اه طبعا فى التزام زاد عليا فلوس انتا خدتها كتامين وهردها تانى فهتفضل التزام لحد ما اردها (يعنى التزام زاد ) اللى هو (تامينات من الغير) يعنى دائن ويبقى القيد كده :
من حـ / البنك (اللى زاد بقيمة الفلوس)
الى حـ / تامينات من الغير ( الالتزام اللى عليا لحد ما ارده تانى)
تمام لما يجى بقى الوكيل يبيع البضاعة ويدى لصاحب البضاعة فلوسها ، الوكيل بيبع البضاعة باسم الموكل (صاحبها) يعنى بفواتير مصدرة من الموكل مش من الوكيل فاى مبلغ بيخش للموكل من الوكيل دى بتعتبر مبيعات بتاعته وبيتحاسب عليها ضريبيا ويبقى القيد شكله كده :
من حـ / البنك (بالفلوس اللى خدها الموكل من الوكيل مقابل بيع البضاعة )
الى حـ/ المبيعات (الفلوس اللى دخلت البنك فدى دخلت مقابل بيع بضاعة فبتعتبر مبيعات)
الى حـ / ضريبة المبيعات ( اللى المفروض يوردها الموكل عن مبيعاته)
طب هنيجى بقى هنا نقول طب احنا فتحنا حساب بضاعة امانة لدى الغير وخلاص البضاعة اتباعت عايزين نقفل الحساب ده نقفله ازاى :
دلوقتى الوكيل باعلى البضاعة وظهر عندى (مبيعات) وهتتحط فى قائمة الدخل طب ايه بقى اللى بيتخصم من رقم المبيعات فى قائمة الدخل علشان اعرف انا كسبت ولا خسرت من النشاط ده ؟، طبعا تكلفة البضاعة اللى انا بعتها (علشان قائمة الدخل بتقولك الشركة باعت بضاعة ب10 ج وكانت تكلفتها 7 ج فكسبت 3 ج ) فلازم قدام كل مبيعات يظهر (حـ / تكلفة البضاعة المباعة) بتكلفة البضاعة دى فبقفل بضاعة امانة لدى الغير فى حـ / تكلفة البضاعة المباعة )
فدلوقتى تكلفة البضاعة المباعة دى مصروف و بتظهر معايا يعنى مصروف زاد يبقى مدين وبضاعة امانة لدى الغير بتقل يعنى اصل بيقل يبقى دائن ويبقى القيد
من حـ / تكلفة البضاعة المباعة (تكلفة البضاعة اللى الوكيل باعها )
الى حـ / بضاعة الامانة لدى الغير ( الاصل اللى خلاص اتباع وقل من عندى )
دلوقتى مفضلش غير حاجة واحدة وهى لما تيجى ترد التامين اللى انت خدته من الوكيل وساعتها هتعكس القيد اللى انت اثبت فيه التامين اللى انت خدته ،هتسدد الالتزام عن طريق البنك (
من حـ / تامينات من الغير (الالتزام اللى قل) 
الى حـ/ البنك ( الاصل اللى قل لما دفعت )
طب افرض بقى دلوقتى فى جزء من البضاعة متباعش (عادى خالص الوكيل هيروح مرجعها للموكل ) وترجع تانى للمخازن فيروح الموكل عاكس القيد الاولانى ويكون القيد
من حـ / المخزن (اللى زاد بالبضاعة اللى رجعتله تانى)
الى حـ / بضاعة الامانة  ( اللى خلاص اتلغت ورجعت تانى المخازن)
كدة احنا خلصنا القيود اللى بتتسجل فى دفاتر الموكل(صاحب البضاعة)
ثانياً : المعالجة المحاسبية فى دفاتر الوكيل :
فى الاول لما الموكل بيدى الوكيل البضاعة (الوكيل مبيسجلش اى قيد محاسبى )ليه ؟ علشان دى بضاعة محطوطة عنده كامانة فمينفعش يسجلها ويضيفها على قيمة المخزن علشان دى مش اصل من اصوله (يعنى مش ملكه) فمينفعش تظهر فى مركزه المالى .
طب بيعمل ايه (مجرد اذن استلام بضاعة بصفة امانة ) علشان يثبت انه استلم البضاعة من الموكل ، طب لما يجى بقى يدفع التأمين مقابل البضاعة للموكل ايه اللى هيزيد عنده ؟، طبعا اصل من اصوله اللى هيزيد اللى هى الفلوس بتاعته اللى دفعها للموكل كتامين (تامينات لدى الغير )(كانه مداين صاحب البضاعة بالفلوس اللى ادهاله ) فيبقى اصل زاد يبقى مدين ، واللى قل طبعا رصيده فى البنك اللى دفع الفلوس وبالتالى اصل نقص يبقى دائن ويكون القيد كدة :
من حـ / تامينات لدى الغير (الاصل اللى زاد عنده )
الى حـ / البنك (الاصل اللى قل لما دفع الفلوس )
لما يجى بقى يبيع البضاعة للعملاء فيبقى كدة هو مداين العملاء بقيمة البضاعة اللى باعها (يعنى ليه فلوس برة عند العملاء مقابل البضاعة ) فيزيد عنده اصل من اصوله اللى هو العملاء يعنى مدين ، فى حاجة تانى زادت ؟، اه طبعا هو دلوقتى بيبع البضاعة دى لمين للموكل (صاحب البضاعة )يبقى مجرد ما بيبيع البضاعة بيبقى مطالب انه يدى للموكل حق البضاعة بتاعته (يعنى فى التزام زاد عليه الفلوس بتاعت بضاعة الموكل اللى المفروض يدهاله مادام باع البضاعة)
يعنى خصم زاد يبقى دائن , طب خلاص كدة (القيد خلص ؟) احنا دلوقتى اثبتنا مديونية العملاء بفلوس البضاعة والتزام الوكيل بسداد تمن البضاعة للموكل ولكن هو مش هيدى الموكل كل الفلوس اللى هياخدها من العملاء (لازم ياخد منها جزء (اللى هو مكسبه) ) فيبقى مجرد تتم عملية البيع بيزيد مكسبه اللى هو ايراداته (ايراد زاد يبقى دائن) يعنى مثلا بعنا البضاعة 100 ج بنقول ان الموكل عايز مننا 90ج وال 10ج دى بقى عمولتنا اللى هناخدها مقابل ان احنا بعناله البضاعة دى ، ويكون القيد :
من حـ / العملاء ( اللى باعنلها البضاعة وبقت مديونة لينا بقيمتها) 100
90 الى حـ/ الموكل (بنثبت الفلوس اللى عايزها مننا صاحب البضاعة اللى هى تمن البضاعة مخصوم منه عمولة الوكيل )
10 الى حـ / عمولة بيع بالوكالة – ايرادات بيع بالوكالة (ايا كان الاسم دى بقى عمولة الوكيل نتيجة بيع بضاعة للغير )
طب لما يجى بقى العميل يدينا فلوس البضاعة ، طبعا اللى هيزيد عندى البنك بالفلوس اللى خدها (اصل زاد يعنى مدين) والعملاء بقى نقصوا بالفلوس اللى دفعوها (يعنى اصل نقص يبقى دائن )ويكون القيد :
من حـ / البنك (اللى زاد بقيمة الفلوس )
الى حـ/ العملاء (اللى نقصوا بقيمة الفلوس اللى دفعوها)
ناقص بقى اخر خطوة انى اسدد للموكل فلوسه ، انا لما بعت ثبتله فلوسه(حق بضاعته) ولما اخد الفلوس من العميل لازم ادهاله فلما ياخد فلوسه يبقى التزام نقص من عليا (يعنى خصم قل يبقى مدين ) والبنك طبعا قل بالفلوس اللى دفعها للموكل (يعنى اصل قل يبقى دائن ) ويكون القيد :
من حـ / الموكل (بفلوس بضاعته اللى خدها خلاص )
الى حـ/ البنك (اللى نقص بالفلوس اللى دفعها )

إعداد المحاسب / محمد محسن

اقرء المزيد

طـرق تـداول الأوراق الـتجـاريـة في الـقـانـون التجاري

طـرق تـداول الأوراق الـتجـاريـة في الـقـانـون التجاري

1. الـتـظـهـيــــر
2. الـمـنـاولــــة

 أولاً  : الـتـظـهــــــــــيـر 

هــو الــتـوقــيـع عـلـى ظـهــر الـــورقــة الـتــجـــاريـــــة تـوقـيــعــاً يـنـتـقـــل بـمـــــوجـبـــه الحــــــق الـثــــابـــت في هـــذه الـورقــة إلــى الـمــُـظَـهــَر إلـيـــه

يراعى في تظهير الورقة التجارية 

• · كـل ورقـة تـجـاريـة ولــو لـم يُـصرح فـيهـا أنهـا مـسـحـوبة لأمـر تـتـداول بـالـتـظـهـيـر 
• · يشـتـرط في الـمـُظهـر الأهـلـيـة الكـامـلـة.
• · لا يُـقـبـل الـتـظهـير الجزئي لـلـورقـة الـتجاريـة.
• · لا يُـقــبـل الـتـظـهـيـر الـمعـلق عـلى شـرط.
• · لابـد أن يُـزيـل الـتـظـهـيـر بـتـوقـيـع الـمـُظـهـر عـلى الـورقـة نفـسها أو عـلى ورقة مسـتقـلة تلصق بها.
• · الـتـظـهـيـر الـمـشـطـوب يعــتـبـر كـأن لـم يـكـن.
• · لا يـجـوز تـداول الـورقـة الـتجارية التي يـضـع فـيهـا الـسـاحـب عـبارة (لـيـسـت لأمـر) أو أية عـبارة أخـرى تـفـيـد هـذا المعــنى إلا بـإتـباع إجـراءات حـوالـة الـحــق. 
• · إذا اشتمل الـتـظهـيـر عـلى عـبارة الـقـيـمـة لـلـتحـصـيـل أو الـقـيـمـة لـلـقــبـض أو الـقـيـمة لـلـتـوكـيـل جاز لـلـحـامـل استعمال جـمـيـع الحـقـوق الـنـاشـئـة عـن الـورقـة الـتـجـاريـة ولـكـن لا يـجـوز له تـظهـيـرهـا إلا عـلى سـبـيـل الـتـوكـيــل .

أنـواع الـتـظهـيـر

1. تـظـهـيـر تـام نـاقـل لـلـمـلـكـيـــههـو الـتـظـهـيـر الذي يـتـرتـب عـلـيـة انتقال مـلـكـيـة الحـق الـثـابـت في الـورقـة الـتـجـاريـة إلـى الـمـُظـهـر إلـيـة وكـذلـك جـمـيـع الـحـقـوق والـضـمـانـات الـمـتـعـلـقـة بـهـا ويـحـرر الـتـظـهـيـر عـلى ظـهـر الـورقـة الـتـجـاريـة وهـو الأكـثـر انتشارا في الـعـمـل.

2. تـظـهـيـر تأميني أو لـلـرهــن
هـو الـتـظـهـيـر المـقـصود بـه رهـن الـحـق الـثـابـت فـى الـورقـة الـتـجـاريـة لـضـمـان ديـن فـى ذمـة الـمـُظـهـِر لـلـمُـظـهَـر الـيـة وهـذا الـرهـن يـعـود بـالـنـفـع عـلـى الـتـجـار لأنـه يـمـكـنـهـم مـن الـحـصـول عـلى الـقـروض بـضـمان هـذه الأوراق، والأمـر يـسـتـلـزم أن يـكـتـب صـراحـاً ضـمـن بـيـانـات الـتـظـهـيـر (والـقـيـمـة لـلـرهـن) أو (والـقـيـمـة لـلـضـمـان)

3. تـظـهـيـر تـوكـيـلى لـلـتـحـصـيـل
التظهير التوكـيلى بمثابة توكـيل للمُظهر إلـيه فى تحصيل قـيمة الورقة التجارية، وغالـباً يتولى ذلـك بنك ويعـتبر التظهير توكيلياً إذا إشـتمل عـلى عـبارة (والقـيمة للتحصيل) أو (والقـيمة للقـبض) ويُخول التظهير التوكيلى للوكيل الحق فى قـبض قـيمة الورقة التجارية لحساب المُظهر وهـذه الوكالة لا تنقـضى بوفاة الموكـل أو الحجز عـلـيه.

ثانياً : الـمـنـاولــة 

وهى إحـد الطرق الـتجارية لـتـداول الأوراق بين المتعاملين وتسمى طريقة التسلـيم حيث تكـون الورقة لحاملها، وتكون الحيازة فى هـذه الحالة هى سند الملكية وهـو إجـراء سهـل وسـريع يـتـفـق مع وظائف الأوراق الـتجارية، وإن كان يسـبب مشـاكـل عـديـدة فى بعـض الحالات.

استحقاق الكمبيالة أو السند الإذنى 

طـرق تعـيـيـن الاستحقاق

• · الاستحقاق لدى الإطـلاع 
• · الاستحقاق بعـد مدة معـينة من الإطلاع
• · الاستحقاق بعـد مدة معـينة من تاريخ الإصدار
• · الاستحقاق في تاريخ معـين 

إتباع أى طريقة أخرى فى تحديـد ميعاد الإسـتحـقـاق أو الجـمـع بـيـن أكـثـر من طـريـقـة يـُبـطـل الورقة التجارية

احتجاج عــدم الـدفــع (الـبـروتـسـتـو)

هـو عـبارة عـن ورقة يحـررها محضر المحكـمة التجارية لإثبات امتناع المدين عـن سـداد الكمبيالة أو السند الإذنى، وهـو وسيلة قاطعة لإثبات تقاعـس المدين ويترتب عـلية التـشهـيـر بالمدين والإضرار بسمعـته في السـوق، ويمكن أن يصل الأمر إلى إشهار إفـلاسه إذا توقـف تماماً عـن السداد .

ميعـاد الـبـروتـسـتـو

ويُجـرى احتجاج عـدم الدفع (البروتستو) طبقاً لـقـانون الـتجارة 17 لسنة 1999 خلال الأربعة أيام التالية ليوم
الإستحـقاق، وتسمى هـذه الـفـتـرة (فـترة الإحتجاج) وتراعى فـيها الـضـوابـط الـتـالـيـة:

• · لا يُحـسـب يوم الإسـتحـقاق ضـمـن مهـلة الإحـتجاج 
• · إذا صادف الـيـوم الأخـير عـطـلة رسـمية إمـتـد الإحـتجاج ليوم العـمـل التالى.
• · إذا تخـلـلت فـترة الإحـتجاج يوم عـطـلة إُحـتسـب هـذا اليوم ضمن المـيعـاد.

قـســيـمـة الــبــــدل (الـفـيــشــة)

هــى قـسـيـمـه بـديـلـه لـكــل ورقــه تـجـاريـه مــودعـه تـحـتــوى عـلـى بـيـانـاتها بـصـوره كامـلـه وتـتـكون مــــن أصــــــل وعـــــدة صــــــــور حـــســـــب نـوعـيـــــة الـســــــــداد.
و تفـيـد قـسـيـمـة الـبـدل فى عـمـلـيات الضـبط اليومى وأيضاً عـمليات الضـبـط أثـناء الجـرد الشهـرى والجـرد الـمـفـاجئ وذلك بعـد إرسال الـورقـة الـتجارية لـلـتحـصـيـل حـيـث أنها تحـتـوى عـلى كـل بـيانـاتهـا وتعـتـبـر بـديـلة لها تماماً لحـيـن إتـمام الـتحـصيـل.

بـيـانـات قـسـيـمـة الـبـدل

• · اسـم الـبـنـك مـقـدم الـورقــه التجـاريـه و فـرعـه
• · اسـم الـبــنـك الـمسحـــوبـه عـلــيــه وفــرعــــه
• · اسـم الــعـمــيــــــــل ورقـــــــــم حــــســـــابــــه
• · اســـم الـمـديـــــن وعـنــــوانــه بالـكــــــامـــــــل
• · الــرقـــم الـمـســلــسـل لـلـورقــة الـتـجــاريـــــة
• · تـاريــــــــــــــــخ اسـتـحــــقـــــــــــــــاقـهــــــــا
• · الــقــيــــمـــــــــه بـالارقـــــــام و الـحــــــــروف
• · تــــــــــــــــــــاريـخ إســـتـــــــــــلامـهــــــــــــــا
• · تـعـلــيــمــــــــــــات الــبــروتـســــــــــــتــــــــــو
• · الـتــعــلــيــمــــــات الـخـاصـــــه إن وجــــــــدت

اقرء المزيد

توزيع الأرباح في الشركات المساهمة

 

توزيع الأرباح في الشركات المساهمة

يحكم توزيع الأرباح في الشركات المساهمة ما ورد بالقانون 159 لسنة 1981 ، وكذلك ما يقضي به نظام الشركة ، وما تقره الجمعية العمومية بهذا الخصوص .
ونستعرض فيما يلي النصوص الواردة بقانون الشركات والخاصة بتوزيع الأرباح في الشركات المساهمة حيث لم يضع المشرع نظاما محددا لتوزيع الأرباح في هذه الشركات غير أنه أورد قيودا معينة أوجب علي الشركات مراعاتها عند التوزيع .

أسس توزيع الأرباح في الشركات المساهمة
لقد تضمن قانون الشركات رقم 159 لسنة 1981 ولائحته التنفيذية الصادرة القرار الوزاري رقم 96 لسنة 1988 نصوصا متفرقة في هذا الصدد نوضحها فيما يلي :

1. الاحتياطي القانوني : وفقا لنص المادة (40) من القانون يتعين علي مجلس الإدارة أن يحتجز من الأرباح نسبة تعادل 5% علي الأقل لتكوين احتياطي قانوني .
- ويجوز للجمعية العمومية وقف تجنيب هذا الاحتياطي إذا بلغ نصف رأس المال المصدر .
- كما يجوز استخدام هذا الاحتياطي في تغطية خسائر الشركة وفي زيادة رأس المال .
2. الاحتياطي النظامي : تنص المادة (193) من اللائحة التنفيذية للقانون علي أنه يجوز أن ينص نظام الشركة علي تجنيب نسبة معينة من الأرباح الصافية لتكوين احتياطي نظامي ، ولا يجوز التصر ف في هذا الاحتياطي في غير الأغراض المخصص لها إلا بموافقة الجمعية العمومية .
3. الأرباح القابلة للتوزيع : حددت المادة (40) من قانون الشركات والمادة (194) من لائحته التنفيذية الارباح القابلة للتوزيع هي : الأرباح الصافية مستنزلا منها ما يكون قد لحق برأس مال الشركة من خسائر في سنوات سابقة وبعد تجنيب الاحتياطي القانوني والاحتياطي النظامي .
4. توزيعات نقدية من الأرباح علي المساهمين والعاملين بالشركة (دفعة أولي) : بعد تجنيب النسب المقررة لتكوين الاحتياطي القانوني والاحتياطي النظامي يتم توزيع 5% علي الأقل من رأس المال المدفوع علي المساهمين والعاملين بشرط ألا يقل نصيب العاملين بالشركة عن 10% ولا يزيد عن مجموع الأجور السنوية للعاملين بالشركة .
وإذا زاد نصيب العاملين عن 10% تجنب الزيادة في حساب خاص يستثمر لصالح العاملين ، معني ذلك انه :

أ‌- إذا نص أن نصيب العاملين في التوزيعات 10% يكون توزيع الدفعة :
90% أرباح للمساهمين .
10% حصة نقدية للعاملين .

ب‌- إذا نص علي أن نصيب العاملين مثلا 20% يكون توزيع الدفعة :
80% أرباح للمساهمين .
10% حصة نقدية للعاملين .
10% حصة إضافية للعاملين .

5. أرباح حصص التأسيس : في حالة وجود حصص تأسيس فإن الشركة تخصص لهم نصيبا في الربح القابل للتوزيع بشرط ألا يزيد علي 10% من صافي الربح بعد خصم الاحتياطي القانوني والاحتياطي النظامي وحجز نسبة 5% علي الأقل كدفعة أولي للمساهمين والعاملين .

6. مكافأة أعضاء مجلس الإدارة : يتم تقدير مكافأة لأعضاء مجلس الإدارة بحد أقصي 10% من صافي الربح بعد حجز الاحتياطي القانوني والاحتياطي النظامي وبعدحجز نسبة 5% علي الأقل كدفعة أولي للمساهمين والعاملين .

7. توزيعات نقدية من الأرباح علي المساهمين والعاملين بالشركة (دفعة ثانية): إذا تبقي ربح بعد إجراء التوزيعات السابق ذكرها فإنه يجوز للجمعية العامة بناء علي اقتراح مجلس الإدا ر ة إجراء توزيعات نقدية كدفعة ثانية علي المساهمين والعاملين فيها.
وتحسب وتوزع الدفعة الثانية مثل الدفعةالأولي .

8. تكوين احتياطيات أخري : تنص المادة (196) من اللائحة التنفيذية لقانون الشركات علي أنه بجوز للجمعية العامة للشركة (بناء علي اقتراح مجلس الإدارة) أن تقرر تكوين احتياطيات أخري بخلاف الاحتياطي القانوني والاحتياطي النظامي .

9. الفائض المرحل : إذا تبقي جزء من الأرباح بعد توزيع ما سبق فإن مجلس الإدارة قد يقترح ترحيلها إلي السنة القادمة لكي تستخدم هذه الأرباح في تعويض النقص في الأرباح الذي قد يحدث في السنوات العجاف التي قد تأتي مستقبلا .

نموذج لتوزيع الأرباح فى الشركات المساهمة

اقرء المزيد

الجمعية العادية وغير العادية

• الفرق بين الجمعية العادية وغير العادية
 
• الجمعية العادية :
الانعقاد : 
تجتمع مرة على الاقل فى السنة وذلك خلال ستة أشهر على الاكثر من انتهاء السنة المالية , حيث يتم فيها مناقشة أمور الشركة بوجه عام بالاضافة إلى أى أمور آخرى مدرجة فى جدول الأعمال.
اختصاصات الجمعية العادية :
1 - مناقشة تقرير مراقب الحسابات ومجلس الادارة
2 - المصادقة على الميزانية وحساب الارباح والخسائر
3 - الموافقة على توزيع الارباح على المساهمين
4 - تحديد مكافات وبدلات اعضاء مجلس الادارة
5 - تعيين مراقب الحسابات وتحديد اتعابة
6 - تكوين احتياطيات اخرى غير الاحتياطى القانونى والنظامى
7 - المصادقة على اى عمل يصدر من مجلس الادارة
نصاب صحة الاجتماع :
- لا يكون انعقاد الجمعيه العامه العاديه صحيحا الا اذا حضره مساهمون يمثلون الحد المنصوص عليه في نظام الشركه بشرط الا يقل عن الربع ولا يزيد عن النصف.
- اذا لم يتوافر الحد الادنى في الاجتماع الاول وجب الدعوه الى اجتماع ثانى خلال ال 30 يوم التاليه للاجتماع الاول .
- يعتبر الاجتماع الثانى صحيحا ايا كانت عدد الاسهم الممثله فيه
- تصدر القرارات باغلبيه الاصوات

• الجمعية غير العادية :
الانعقاد :
- ليس لها وقت محدد تعقد فى اى وقت فى السنة
- على مجلس الادارة أن يدعو الى الجمعية العامة غير العادية اذا طلب اليه عدد من المساهمين يمثلون 11 % من راس المال على الاقل وذلك لاسباب جدية
- قد تعقد بناء على دعوة مجلس الادارة اذا بلغت خسائر الشركة فى سنة مالية واحدة أو اكثر نصف راس المال المصدر
اختصاصات الجمعية غير العادية :
1 - زيادة راس المال المرخص به او خفضه
2 - اضافة اغراض مكملة أو مرتبطة أو قريبة من غرض الشركه الاصلى
3 - تعديل الحقوق او المميزات او القيود المتعلقة بأنواع الأسهم
4 - اندماج الشركة
5 - تغيير الشكل القانونى
6 - تغيير الغرض الاصلى
7 - حل الشركة قبل الميعاد
نصاب صحة الاجتماع :
- لا يكون انعقاد الجمعية العامة غير العادية صحيحا الا اذا حضره مساهمون او اصحاب حصص راس المال يمثلون نصف راس المال على الاقل
- اذا لم يتوافر الحد الادنى في الاجتماع الاول وجب الدعوة الى اجتماع ثانى خلال ال 30 يوم التالية للاجتماع الاول
- يعتبر الاجتماع الثانى صحيحا اذا حضره مساهمين يمثلون ربع راس المال
- تصدر القرارات بثلثى الأسهم اما اذا كان القرار ( زياده راس المال او خفضه ، حل الشركه ، تغيير الغرض ) تصدر القرارات ثلاثة أرباع الاسهم  .

اقرء المزيد

إجراءات زيادة رأس المال في الشركات المساهمة

إجراءات زيادة رأس المال في الشركات المساهمة
1 - يتم إيداع المبلغ فى احدي البنوك المصرح لها بالاكتتاب مثل بنك الأسكندرية يتم أخذ شهادة بنكية بقيمة الزيادة .
2 - تتم ارسال الدعوة للسادة المساهمين وأعضاء مجلس الإدارة وكذلك لمراقب الحسابات والهيئة العامة لسوق المال والهيئة العامة للاستثمار .
3 - يتم انعقاد ( كتابة محضر اجتماع ) جمعية عامة غير عادية بالموافقة على زيادة رأس مال الشركة المصدر .
4 - يتم كتابة عقد تعديل للمواد 6  , 7 من النظام الأساسى للشركة .
5 - يتم تسليم المحضر + عقد التعديل + صورة حديثة من السجل التجارى + صورة النظام الاساسى بأخر تعديلات فيه + الدعوات المرسله + كشف حضور المساهمين + كشف حضور اعضاء مجلس الإدارة . وذلك كله بعد استكمال كافة التوقيعات والاختام من مراقب الحسابات وتوقيعات المساهمين وأعضاء مجلس الإدارة .
6 - يتم تسليم هذه المستندات إلى الهيئة العامة للاستثمار للاعتماد والموافقة .

اقرء المزيد

أنواع الشركات

- أنواع الشركات

• اولاً شركات الاشخاص :
- شركة التضامن :
هي النموذج الأمثل لشركات الأشخاص حيث يكون كل شريك فيها مسؤولاً مسؤولية تضامنية ، وفي جميع أمواله عن ديون الشركة كما يكتسب كل شريك فيها صفة التاجر.
- شركة التوصية البسيطة :
تتكون من فريقين من الشركاء: شركاء متضامنين يخضعون لنفس النظام القانوني الذي يخضع له الشركاء في شركة التضامن ، فيكونون مسؤولين مسؤولية تضامنية، وغير محددة عن ديون الشركة ويكتسبون صفة التاجر ، وشركاء موصين لا يسألون عن ديون الشركة إلا في حدود حصصهم ولا يكتسبون صفة التاجر ولا يشاركون في إدارة الشركة.
- شركة المحاصة :
هي شركة مستترة لا تتمتع بالشخصية المعنوية ولا وجود لها بالنسبة إلى الغير وتقتصر آثارها على الشركاء فقط .

• ثانياً شركات الأموال :
- الشركة المساهمة :
هى شركة ينقسم رأس مالها الى اسهم متساوية القيمة يمكن تداولها على الوجه المبين فى القانون وتقتصر مسئولية المساهم على اداء قيمة الاسهم التى اكتتب فيها ولا يسأل عن ديون الشركة الا فى حدود ما اكتتب فيه من اسهم ويكون للشركة أسم تجارى يشتق من الغرض من انشائها ولا يجوز للشركة ان تتخذ من اأسماء الشركاء أو أسم احدهم عنواناً لها .
- الشركة ذات المسئولية المحدودة :
تشبة الشركة ذات المسئولية المحدودة شركات الأشخاص من ناحية أن عدد الشركات فيها لا يجوز أن يزيد على خمسين شريكاً وأن حصة الشريك فيها ليست قابلة للتداول بالطرق التجارية بل يخضع تداولها لقيود معينة أهمها إمكان استرداد هذه الحصة للشركاء وأنه لا يجوز تأسيسها عن طريق الاكتتاب العام وفى النهاية لا يجوز لها إصدار أسهم أو سندات قابلة للتداول ، وتقترب هذه الشركة من شركات الأموال من حيث نظام إدارتها وتأسيسها ومن حيث تحديد مسئولية الشركاء فيها وانتقال حصة كل شريك إلى ورثته.
- شركات التوصية بالأسهم :
تتكون هذه الشركات من نوعين من الشركاء شركاء موصون لا يسألون إلا بمقدار الحصص التى يقدمونها وتتخذ هذه الحصص شكل أسهم قابلة للتداول لا تختلف عن الأسهم فى شركات المساهمة، وشركاء متضامنون يسري عليهم ما يسري على الشركاء المتضامنين في شركات التضامن وشركات التوصية البسيطة، ومن ثم يكتسبون صفة التاجر وتكون مسئوليتهم مطلقة في جميع أموالهم ويقومون بإدارة الشركة.

اقرء المزيد

الشركات القابضة والتابعة والشقيقة

• الشركة القابضة : هي الشركة أو المؤسسة التي تمتلك الأسهم المتداولة لشركات الأخرى . وغالبا مايشير المصطلح بشكل أساسي إلى الشركة التي لا تنتج السلع أو الخدمات بنفسها، وإنما الغرض منها فقط تملك أسهم الشركات الأخرى وتمتلك الشركة القابضة عادة أغلبية الأسهم في الشركة التابعة .

• الشركة التابعة : هي شركة ممتلكة من شركة مستقلة أكبر منها وقد تكون الشركة شركة خاصة أو شركة محدودة ، وتسمي الشركة المالكة " الشركة الأم ". و تمتلك الشركة الأم إما جميع أسهم الشركة أو معظم أسهم رأس المال . و ليس من الضروري أن تعمل الشركة الأم وشركتها التابعة في نفس المكان أو في نفس العمل التجاري ، حتى أنه من الممكن أن تكون الشركتان متنافستان في السوق .

• الشركات الشقيقة : هي شركة يكون للمستثمر فيها نفوذ مؤثر ولكنها ليست شركة تابعة كما أنها ليست حصة في مشروع مشترك للمستثمر وتتضمن أيضاً شركات الأفراد . والنفوذ المؤثر : هو القدرة علي المشاركة في إتخاذ القرارات المتعلقة بالبيانات المالية وسياسات التشغيل للشركة المستثمر فيها .

اقرء المزيد

الأسهم والسندات

الفرق بين الأسهم والسندات
• الأسهم : السهم عبارة عن حصة المساهم فى رأس مال الشركة الذى يخوله للحصول على نسبة من أرباح الشركة والإشتراك فى توزيع موجوداتها عند تصفيتها .
وعرفت الأسهم بأنها صكوك متساوية القيمة , قابلة للتداول دون تجزئة , وتمثل حق المساهم فى الشركة التى أصدرته بإعتباره شريكاً .
- أنواعها : الأسهم العادية - الأسهم الممتازة .
• السندات : هى عملية إقتراض تقوم بها الشركات المساهمة عن طريق إصدار سندات وتكون هذه السندات بمعدل فائدة ثابت ولفترة زمنية محددة وفى نهاية هذه الفترة ترد قيمة السندات .
- أنواعها : السندات المضمونة - السندات غير المضمونة - السندات القابلة للتحويل- السندات القابلة للإستدعاء .
• بإختصار السهم : فائدته معرضه للربح أوالخسارة أما السند : فهو أداة قرض بفائدة محددة وثابتة .
القيم المختلفة للسهم
1 - القيمة الإسمية للسهم : هي القيمة المحددة للسهم عند الإصدار والمدونة على قسيمة السهم ويتم تحديدها في عقد التأسيس ولا تقل عن واحد جنيه .
2 - قيمة الإصدار : وهي القيمة التي يتم إصدار السهم علي أساسها ويشتري المكتتب ( المساهم ) السهم علي أساسها .
3- القيمة الدفترية للسهم : يقصد بها نصيب السهم في صافي أصول الشركة محسوبة علي أساس القيم التي تظهر بها
في دفاتر الشركة كما تظهر بالميزانية في تاريخ معين .
4 - القيمة الحقيقية للسهم : يقصد بها نصيب السهم في صافي أصول الشركة بعد إعادة تقديرها .
5 - القيمة السوقية للسهم : يقصد بها نصيب القيمة التي يباع بها السهم في سوق الأوراق المالية .
أنواع رأس المال
• رأس المال المصرح به : ويقصد به مبلغ رأس المال المصرح للشركة بأن تصدر أسهمها في حدوده والمنصوص عليه في القرار الصادر بالموافقة علي تأسيس الشركة .
• رأس المال المصدر والمكتتب فيه : ويتكون من مجموع القيم الإسمية لمختلف أنواع الأسهم التي أصدرتها الشركة فعلا وتم الاكتتاب فيها .
• رأس المال المدفوع : ويقصد به القدر المدفوع من القيمة الإسمية للأسهم المصدرة والمكتتب فيها (حيث أنه قد يتم السداد دفعة واحدة لكامل قيمة السهم أو علي دفعات ) حسب احتياجات الشركة .

اقرء المزيد