المصروف المقدم والمصروف المستحق

يعنى ايه مصروف مقدم؟! ويعنى ايه مصروف مستحق؟!
في الأول لازم نعرف يعنى ايه مصروف
  المصروف : هو اى مبلغ الشركة بتدفعه علشان تاخد قصاده خدمه (الخدمة دى اللى هتساعد الشركة انها تنتج وبالتالي هتبيع وبالتالي تكسب)
زى ايه؟
 1 –الايجار:  الشركة بتدفع فلوس مقابل انها تاجر مكان المصنع (هي دى الخدمة)(الايجار ده اللى هيخلى الشركة تفضل في المكان ده وتستخدمه علشان تعرف تنتج منتاجتها وتبيع وتكسب)
 2- فاتورة الكهرباء:  الشركة بتدفع فلوس علشان يجيلها كهرباء (هي دى الخدمة) (الكهرباء دى اللى الشركة هتشغل بيها الالات والماكينات اللى هتنتج فالبتالى هنبيع وهتكسب)
يبقى الملخص المصروف هو مبلغ بتدفعه الشركة علشان يجيبلها مكسب اللى هو ايراد (سواء في نفس السنة او على كذا سنة)

طب افرض لو الشركة دفعت فلوس ومخدتش قصادها اى خدمة ولا هتاخد ومفيش اى مقابل للفلوس اللى ادفعت دى ساعتها تبقى دى اسمها (خسارة) ليه؟ علشان دا مبلغ خسرته الشركة دفعته ومخدتش مقابله اى حاجة فكانها رمته في الهوا، زى ايه ؟
1- عندى فاتورة كهرباء ب 100ج ومرضتش ادفعها في وقتها راحت مصلحة الكهرباء قالتلى علشان تاخيرك دا هنفرض عليك غرامة 10ج فهتدفع 110 ج (نيجى هنا ال110 ج خدت مقابلهم كلهم خدمة لا طبعا ،انا خدت خدمة (اللى هي الكهرباء ب 100 ج بس) وال 10 ج فلوس هدفعها ومش مقابلها اى حاجة ولا اى خدمة (يبقى انا خسرتها وتتسمى خسارة ) .

طب يعنى ايه مصروف إيرادى و مصروف راسمالى ؟ المصروف الايرادى والمصروف الراسمالى : تعريفهم هو نفس تعريف المصروف بالظبط (مبلغ بتدفعه الشركة علشان تجيب ايراد او مكسب )
بس الفرق ان المصروف الايرادى بيجيبلى الايراد والمكسب في نفس السنة (في نفس الفترة المالية )
زى الايجار , الكهرباء , النظافة والمياة (دى مصاريف ايرادية )بستفيد منهم خلال نفس السنة يعنى (بيساعدونى على تحقيق ايراد او مكسب خلال نفس السنة )
اما المصروف الراسمالى بيجيبلى الايراد والمكسب السنادى وسنييين جاية يعنى (بيساعدنى على تحقيق ايراد او مكسب على كذا سنة مش سنة واحدة بس مثلاً
1- اشتريت الة (الالة دى هتساعدنى في الإنتاج السنادى والسنة اللى جاية واللى بعديها لحد ما تجيب اخرها ) (يبقى هي كدة ساعدتنى في الإنتاج السنادى والسنة اللى جاية واللى بعيدها وبالتالي ساعدتنى انى احقق مكسب السنادى والسنة اللى جاية واللى بعديها ) مش السنادى بس.
2- عملت عمرة لموتور العربية اللى بتنقلى البضايع (العمرة دى اللى هتخلى العربية تشتغل سنين اكتر يبقى هتساعدنى في توصيل البضاعة السنادى والسنة اللى جاية وهكذا ، يبقى هتساعدنى في تحقيق مكاسب وايرادت على كذا سنة مش سنة واحدة ).

بعد ما شرحنا يعنى ايه مصروف نيجى بقى لموضوعنا يعنى ايه مصروف مقدم ومصروف مستحق ؟
 1- المصروف المقدم :  ده مبلغ الشركة بتدفعه قبل ما تاخد الخدمة (يعنى دفعت الفلوس ولسة مخدتش الخدمة – هتاخدها بعدين) طب حد يقول مانا مخدتش مقابل الفلوس دى خدمة تبقى (خسارة) ؟ لا طبعا الخسارة مخدتش خدمة ولا هتاخد خدمة خالص ولكن المصروف المقدم مخدتش خدمة دلوقتى ولكن هاخدها بعدين.
طب زى ايه
الشركة مأجرة مخزن للبضاعة بتاعتها بتدفع ايجار الشهر الجديد فى نهاية الشهر اللى قبله يعنى مثلا ايجار شهر مارس هى بتدفعه في اخر شهر فبراير (يبقى الشركة كدة بتدفع فلوس في شهر وبتاخد الخدمة فى شهر تانى) يعنى بمعنى تانى انا دافع فلوس مقدما قبل ما اخد الخدمة.

2- المصروف المستحق :  دى بقي خدمة الشركة خدتها ولسة مدفعتش فلوسها وهتدفع فلوسها بعدين (يعنى عليها مبلغ مستحق بقيمة الخدمة دى دين عليها لحد ما تسدده)
زى ايه؟
زى خدمة التليفون: الشركة استفادت بخدمة التليفونات شهر مارس وابريل وكمان مايو ومدفعتش مليم للمصرية للاتصالات مقابل الخدمة وفى شهر يونيو بيجيلها فاتورة من المصرية للاتصالات باستهلاك ال 3 شهور كلهم، تروح الشركة مسددة الفلوس المستحقة عليها(قيمة خدمة ال 3 شهور).
بعد ما شرحنا المصروف المقدم والمستحق؟ نيجى للسؤال الأهم، ايه موقف المصروف المقدم والمستحق بالنسبة للشركة؟! يعنى بيعتبروا أصول ولا خصوم ولا مصروف ولا ايراد؟

أ_المصروف المقدم :  احنا قولنا ان المصروف المقدم دى فلوس ادفعت ومخدتش مقابلها خدمة هخادها بعدين يعنى دى فلوس بتاعتى ادتها لجهة ومخدتش مقابل الفلوس اى حاجة يبقى انا كدة مداين الجهة دى بالفلوس بتاعتى لحد ما يقدمولى الخدمة (يعنى فلوس ليا برة) فبتتعامل نفس معاملة العملاء لما بديهم بضاعة ومسددوش تمنها ، فبتعتبر اصل من اصول الشركة لحد ما استفاد بالخدمة ساعتها يبقى فلوس ادفعت مقابل خدمة فتبقى مصروف .
ب_المصروف المستحق :  احنا قولنا ان المصروف المستحق دى خدمة استفدت بيها ولسة مدفعتش تمنها يعنى انا مطالب بسداد تمن الخدمة دى علشان انا مديون بقيمة الخدمة دى للجهة اللى ادتهالى يبقى ده التزام عليا ، فتعتبر خصم من خصوم الشركة .

المعالجة المحاسبية :

ثانياً : المعالجة المحاسبية   للمصروف المقدم : 
احنا قولنا ان المصروف المقدم هو أصل من أصول الشركة وبيظهر في حالة ان فلوس بتدفع مقدما قبل ما استفيد بالخدمة (فبمجرد ان الحالة دى بتظهر) بيظهر المصروف المقدم يعنى بيظهر أصل جديد (يعنى أصل بيزيد يبقى مدين)، طب الطرف الدائن؟ الطرف الدائن اللى دفع الفلوس دى اللى هو البنك او الخزنة (على حسب مين اللى دفع الفلوس فيهم وقل بقيمتها) يبقى القيد الأول (في حالة ظهور المصروف المقدم):
من حـ/ المصروف المقدم (الأصل اللى زاد عندى) (على حسب اسم المصروف ممكن يكون ايجار مقدم، تامين مقدم، م. دعاية وإعلان مقدم)
الى حـ / البنك او الخزنة (اللى سدد قيمة المصروف المقدم ده) طب خلاص كدة؟!
لا طبعا لسة لما اخد الخدمة اللى انا دفعت علشانها الفلوس دى واستفيدبيها ايه اللى بيحصل ؟، اللى بيحصل ان الفلوس اللى ادفعت بتبقى خلاص مقابلها خدمة وانا خدتها و استفدت بيها فبقت (مصروف فعلى) (فلوس دفعتها وخدت خدمة) فيبقى المصروف الفعلى ظهر يعنى مصروف زاد ولازم اثبته (مصروف بيزيد يبقى مدين) واصل عندى قل (اللى هو المصروف المقدم)(اصل بيقل يبقى دائن) يبقى القيد :
من حـ / المصروف الفعلى (على حسب اسم المصروف ممكن يكون ايجار ، تامين ، م. دعاية وإعلان)
الى حـ / المصروف المقدم (الأصل اللى قل عندى) (على حسب اسم المصروف ممكن يكون ايجار مقدم، تامين مقدم، م. دعاية وإعلان مقدم) 

ثانياً : المعالجة المحاسبية   للمصروف المستحق : 
المصروف المستحق (دى خدمة خدتها ولسة مدفعتش تمنها) (يعنى تمنها التزام عليا) يعنى خصم جديد بيظهر من ضمن خصومى (يعنى خصم زاد يبقى دائن)، طب الطرف المدين؟ الطرف المدين هو الخدمة اللى خدتها واستفدت بيها يعنى مصروف فعلى زاد (مصروف زاد يبقى مدين) يبقى القيد:
من حـ / المصروف الفعلى (على حسب اسم المصروف ممكن يكون ايجار،تامين،مرتبات)
الى حـ / المصروف المستحق ( الالتزام اللى زاد عليا ومطالب انى اسدده بعد كدة ) طب خلاص كدة؟! لا طبعا لسة لما اسدد بقي قيمة الخدمة دى اللى انا خدتها (يعنى سددت الالتزام اللى عليا اللى هو المصروف المستحق) (يبقى خصم من خصومى قل يبقى مدين)طب الطرف الدائن؟ الطرف الدائن اللى سددت من خلاله قيمة الخدمة اللى سبق وخدتها اللى هو البنك او الخزنة (على حسب مين اللى دفع الفلوس فيهم وقل بقيمتها)
ويبقى القيد:
من حـ / المصروف المستحق (الالتزام اللى قل)
الى حـ / البنك اوالخزينة (اللى سدد قيمة الالتزام اللى عليا) 

بعد ماشرحنا المعالجة المحاسبية في معلومة مهمة جدا جدا جدا، ايه هي؟
ان كل من (الايراد المقدم والايراد المستحق والمصروف المقدم والمصروف المستحق ) دى حسابات بتظهر في حالة الإيرادات والمصروفات اللى مش متعلقة بنشاط الشركة يعنى مصروفات وايرادات أخرى علشان الإيرادات المتعلقة بنشاط الشركة اسمها مبيعات وساعتها بيظهر حساب العملاء وده اللى بنرمى عليه (الاستحقاق والسداد ) يعنى البضاعة اللى بيعناها ولسة مخدناش فلوسها او الفلوس اللى خدناها مقدما ولسة مدناش البضاعة مقابلها ، والمصروفات المتعلقة بنشاط الشركة اسمها المشتريات وساعتها بيظهر حساب الموردين وده برده اللى بنرمى عليه (الاستحقاق والسداد برده) يعنى بضاعة اشترناها ولسة مسددناش فلوسها او فلوس دفعناها مقدما ومخدناش البضاعة لسة .
 •  موضوع : الإيراد المقدم والمستحق 

الموضوع من إعداد المحاسب:  أ . محمد محسن